झारखंडमधील पाकूर जिल्ह्यात एका १५ वर्षीय अल्पवयीन मुलीवर सामूहिक बलात्कार झाल्याची घटना समोर आली आहे. धक्कादायक म्हणजे सहा आरोपींनी अल्पवयीन मुलीला तीन दिवस बंदी बनवून ठेवले आणि नंतर तिच्यावर सामूहिक बलात्कार केला. याप्रकरणी पोलिसांनी सहा आरोपींपैकी तिघांना अटक केली असून इतरांचा शोध घेत आहेत.

मिळालेल्या माहितीनुसार, पाकुर जिल्ह्यातील मालपहारी ओपी भागातील एक १५ वर्षीय मुलगी तिच्या गावातील एका दुकानात काही वस्तू खरेदी करण्यासाठी गेली होती. तिथे आधीच उपस्थित असलेल्या सहा तरुणांनी तिला जबरदस्तीने एका ट्रकमध्ये ओढत नेवून जबरदस्ती बसवले. तसेच तिला धमकावून एका निर्जन ठिकाणी नेले आणि ओलीस ठेवले. त्यानंतर आरोपींनी तिच्यावर तीन दिवस सामूहिक बलात्कार केला.

त्यानंतर मुलीला निर्जनस्थळी सोडून तरुणांनी पळ काढला. मुलीच्या घरच्यांनी ती बेपत्ता असल्याची माहिती पोलिसांत दिली. पोलिसांनी गुन्हा दाखल करत तपास सुरु केला. तपासादरम्यान पीडित मुलगी नको त्या अवस्थेत जखमीरीत्या निर्जनस्थळी सापडली. पोलिसांनी मुलीची विचारपूस केली असता तिने घडलेल्या घटनेबाबत पोलिसांना सविस्तर सांगितलं.

मुलीच्या जबाबावरून पोलिसांनी तपासाला सुरुवात केली आणि या प्रकरणाशी संबंधित सहा आरोपींपैकी तिघांना अटक केली. तसेच पोलीस इतरांचा शोध घेत आहेत. या घटनेनंतर परिसरात संतापाचे वातावरण निर्माण झाले असून मुलींच्या सुरक्षिततेवर पुन्हा प्रश्नचिन्ह निर्माण झाले आहे.