जयपूरमध्ये स्पर्धा परीक्षांच्या तयारीसाठी मदत करण्याच्या बहाण्याने एका तरुणीवर बलात्कार केल्याची धक्कादायक घटना समोर आली आहे. या प्रकरणी जलुपुरा पोलीस ठाण्याने एका पोलीस अधिकाऱ्याला अटक केली असून आरोपीवर गंभीर गुन्हे दाखल करण्यात आले आहेत. या घटनेमुळे पोलीस दलात खळबळ उडाली असून याप्रकरणी पुढील तपास सुरु आहे.

पोलिसांनी दिलेल्या माहितीनुसार, अटक करण्यात आलेला आरोपी पप्पुलाल बैरवा हा मूळचा राजस्थानातील बुंदी जिल्ह्यातील रहिवासी असून सध्या जोधपूर ग्रामीण पोलीस लाइनमध्ये कार्यरत होता. पीडित तरुणी आणि आरोपी हे शेजारील गावांचे रहिवासी असल्याने त्यांच्यात आधीपासून ओळख होती. आरोपीने तरुणीला स्पर्धा परीक्षांच्या तयारीत मदत करतो सांगून जयपूरला बोलावले. त्याने तिची राहण्याची व्यवस्था भाड्याच्या खोलीत केली. या काळात दोघांमध्ये जवळीक वाढली आणि आरोपीने तिला लग्नाचे आश्वासन दिले. मात्र, याच विश्वासाचा गैरफायदा घेत आरोपीने तिच्यावर वारंवार अत्याचार केल्याचा आरोप आहे.

पीडितेच्या तक्रारीनुसार, आरोपी तिला विविध बहाण्यांनी सिंधी कॅम्प परिसरातील हॉटेलमध्ये बोलावून तिच्यावर जबरदस्ती करत असल्याचा आरोप आहे. तरुणीने विरोध केल्यावर तो पुन्हा लग्नाचे आश्वासन देत तिची समजूत काढत होता. अशा प्रकारे आरोपीने अनेक वेळा तिचा गैरफायदा घेतल्याचे समोर आले आहे. दरम्यान, जेव्हा पीडितेने आरोपीवर लग्नासाठी दबाव टाकला, तेव्हा त्याने नकार दिला. त्यानंतर आपली फसवणूक झाल्याचे लक्षात येताच तरुणीने २४ मार्च रोजी जलुपुरा पोलीस ठाण्यात तक्रार दाखल केली.

तक्रार मिळताच पोलिसांनी तातडीने कारवाई करत पीडितेची वैद्यकीय तपासणी केली आणि जबाब नोंदवला. प्रकरणाचे गांभीर्य लक्षात घेऊन आरोपीला पकडण्यासाठी सापळा रचण्यात आला. अखेर आरोपीला अटक करण्यात आली असून शुक्रवारी त्याला न्यायालयात हजर करण्यात आले. न्यायालयाने त्याला न्यायालयीन कोठडीत पाठवले आहे. या प्रकरणामुळे महिलांच्या सुरक्षेबाबत पुन्हा एकदा प्रश्न उपस्थित झाले असून, अशा घटनांवर कठोर कारवाईची मागणी नागरिकांकडून होत आहे.