गोंड : उत्तर प्रदेशात एक धक्कादायक घटना समोर आली आहे. लग्नाच्या एका महिन्यानंतरच पती हा पत्नीच्या वहिनीसोबत पळून गेल्याची धक्कादायक घटना समोर आली आहे. एका तरुणाचं त्याचा मेव्हण्याच्या बायकोवरच जीव जडला. त्यामुळे स्वत:च्या पत्नीला सोडून तो तिच्या वहिनीलाचा घेऊन पळून गेला. या प्रकरणी पीडित पत्नीने पोलीस स्टेशनमध्ये तक्रार दाखल केली आहे. हे संपूर्ण प्रकरण उत्तर प्रदेशातील गोंड जिल्ह्यातील धानेपूर पोलीस स्टेशन परिसरातील असल्याचं सांगितलं जात आहे.

पोलिसांनी दिलेल्या माहितीनुसार, जो तरुण आपल्या मेव्हण्याच्या बायकोसोबत पळून गेला, त्याच्या लग्नाला फक्त एकच महिना झाला आहे. गेल्या महिन्यात ६ मे रोजी तरुणाचं लग्न झालं होतं. लग्नादरम्यानच तरुणाची आपल्या मेव्हण्याच्या बायकोशी नजरानजर झाली आणि तिथेच दोघेही एकमेकांच्या प्रेमात पडले. ज्यानंतर मेव्हण्याच्या बायकोने पळून जाण्याचा कट रचला.

पोलीस तक्रारीनुसार, ७ जून रोजी तरुण पत्नीच्या वहिनीसोबत पळून गेला. याबाबत जेव्हा नवविवाहित महिलेला समजलं तेव्हा तिने तात्काळ धानेपूर पोलीस ठाण्यात तक्रार दिली. ज्यामध्ये तिने सांगितलं की. 'गेल्या महिन्यात ६ मे रोजी धानेपूर येथे एका गावात तिचं लग्न झालं होतं. तिच्या वडिलांनीही त्यांच्या ऐपतीनुसार, पैसा आणि हुंडा दिला होता. लग्नानंतर महिला सासरी आली. पण तिचा पती आणि इतर सासरच्या लोकांनी कमी हुंडा आणल्याबद्दल तिला टोमणे मारण्यास सुरुवात केली.'

नवविवाहित महिलेने यावेळी असाही आरोप केला की, 'तिच्या सासरकडील लोकांनी तिला अपशब्द वापरत मारहाणही केली. ३० मे रोजी तिच्या सासरकडील लोकांनी तिला मारहाण केली आणि तिचं माहेर असलेल्या नजीकच्या बाजारात तिला सोडून दिलं. त्यानंतर ती बिकट परिस्थितीत तिच्या माहेरी पोहोचली आणि उपचार घेतले.' यानंतर पीडित महिलेने पोलिसांना असंही सांगितलं की, 'तिचा पती तिला सोडून तिच्या वहिनीसोबत कुठेतरी पळून गेला आहे. पती नेहमी माझ्या भावाच्या बायकोचं म्हणजे वहिनीचं कौतुक तिच्याकडे करायचा. ती कशी चांगली आहे हे तो बोलत असायचा.'