मेरठमध्ये एक धक्कादायक आणि संतापजनक घटना घडली आहे. मिळालेल्या माहितीनुसार, लिसाडी गेट परिसरात १३ वर्षांच्या अल्पवयीन मुलीचं दोन स्थानिक तरुणांनी जबरदस्तीने अपहरण केलं. इतकंच नाही, तर तिला दारू पाजून तिच्यावर बलात्कार केला. या प्रकरणात पोलिसांनी मुख्य आरोपीला अटक केल्याची माहिती आहे.
नातेवाईकांनी माहिती दिली की, बुधवारी दुपारी मुलगी घरातून भाजी आणण्यासाठी घराबाहेर पडली होती. त्याच वेळी २३ वर्षीय उवैश आणि त्याचा २६ वर्षीय साथीदार सुहेल यांनी तिला जबरदस्तीने टेम्पोमध्ये बसवलं. यानंतर तिला जंगलाजवळील वीज बंबा बायपास परिसरात नेण्यात आलं. तिथे मुलीला जबरदस्तीने बीयर पाजण्यात आली आणि त्यानंतर उवैशने तिच्यावर बलात्कार केला.
रात्री उशिरा मुलगी कशीबशी तिथून पळून घरापर्यंत पोहोचली. तिने घडलेली घटना तिच्या कुटुंबीयांना सांगितली. त्यानंतर कुटुंबाने तातडीने पोलिसांकडे तक्रार नोंदवली.
तक्रारीनंतर पोलिसांनी मुख्य आरोपी उवैशला अटक केली आहे. तर या घटनेतील दुसरा आरोपी सुहेल सध्या फरार असून त्याच्या शोधासाठी पोलिसांनी छापेमारी सुरू केली आहे. या गुन्ह्यात वापरलेला टेम्पो शोधण्याचंही काम पोलिसांकडून सुरू आहे.
कोतवाली क्षेत्राचे सर्कल ऑफिसर अभिषेक पटेल यांनी सांगितलं की, पीडितेला जिल्हा रुग्णालयात वैद्यकीय तपासणीसाठी पाठवण्यात आलं आहे. तर इंस्पेक्टर अशोक यादव यांनी सांगितलं की, मुलीने दिलेल्या जबाबात उवैशवर बलात्काराचा आरोप केला आहे.