बीड मधून मोठी बातमी समोर आली आहे. बीडमधील बडतर्फ पोलीस उपनिरीक्षक रणजीत कासले याला पुन्हा मध्यरात्री गुजरात पोलीसांनी लातूरमधून अटक केली आहे. घर फोडीतील आरोपींना मदत केल्याप्रकरणी पोलिसांनी कासले याला ताब्यात घेतले आहे. दोन दिवसांपासून पोलीस कसलेच्या मागावर असल्याचे म्हटले जात आहे.

मिळालेल्या माहितीनुसार, या बडतर्फ पोलीस उपनिरीक्षक रणजित कासलेने नवा कारनामा केला आहे. गुजरातमधील जबरी घर फोडीतील आरोपींना मदत केल्याच्या संशयावरून कासले याला पोलिसांनी ताब्यात घेतले आहे. गुजरात पोलिसांनी दोन दिवसांपासून कासलेच्या अटकेसाठी शोध मोहीम सुरु केली होती. अखेर लातूर पोलीस आणि गुजरात पोलीसांच्या एकत्रित मोहीमेला यश आले असून आज मध्यरात्री कासलेला ताब्यात घेण्यात आले.

लातूर येथून कासलेला ताब्यात घेण्यात आले आहे. यानंतर लातूर पोलिसांनी गुजरात पोलिसांकडे त्याचा ताबा दिला आहे. पोलिस त्याला गुजरातला घेऊन गेले आहेत. सूरत आणि आजुबाजूच्या परिसरात जबरी घरफोड्या आणि चोऱ्या करणाऱ्या आरोपींकडून रणजित कासलेची माहिती पोलिसांना मिळाली. या आरोपींनी गुजरात पोलिसांना सांगितले की, रणजीत कासलेने आपल्याला मदत आणि इतर सहकार्य केले. यानंतर पोलिसांनी तपासाची चक्रे फिरवली. कासलेचा माग काढला आणि अखेर तो लातूरमध्ये असल्याचा ठावठिकाणा लागला.

मस्साजोगचे सरपंच संतोष देशमुख हत्या प्रकरणातील म्होरक्या वाल्मीक कराड याच्या एन्काऊंटरची कासले याला ऑफर मिळाली असल्याचे त्याने म्हटले. त्यानंतर त्याने असा गौप्यस्फोट केला की, ईव्हीएममध्ये फेरफार करण्यासाठी त्याला दहा लाखांची ऑफर होती. कासलेच्या या वादग्रस्त विधानानंतर पोलिसांनी सापळा रचून रणजित याला अटक केली. शिवाय त्याला बडतर्फ करण्यात आले. रणजीत कासलेवर आतापर्यंत ७ गुन्हे दाखल झाले आहेत.