(भूषण अहिरे)

Dhule Local Crime Branch :

धुळ्यातील पोलिसांच्या स्थानिक गुन्हे शाखेच्या पथकाने नशेचं रॅकेट उद्धवस्त केले आहे. पोलिसांनी गुंगीकारक औषधाचा मोठा साठा जप्त केलाय. गुन्हे शाखेने या कारवाईत ४ जणांकडून गुंगीकारक औषधाच्या सुमारे ५८० बाटल्या आणि नशेसाठी वापरल्या जाणाऱ्या ५ हजाराहून जास्तीच्या गोळ्या हस्तगत केल्या आहेत.(Latest News)

राज्यात ललित पाटील ड्रग्स प्रकरण चर्चेत असताना ही कारवाई झाल्याने धुळे पोलिसांची ही कारवाई मोठी मानली जात आहे. या नशेच्या रॅकेटमध्ये मेडिकल चालकासह एमआरचाही सहभाग असल्याने या चौघांना ताब्यात घेतले आहे. या रॅकेटमध्ये आणखी किती जणांचा सहभाग आहे. हे पुढील तपासात समोर येईल. या प्रकरणाचा तपास स्थानिक गुन्हे अन्वेषण (Local Crime Investigation) विभागातर्फे करण्यात येत आहे.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

ही कारवाई जिल्हा पोलीस अधीक्षकांना मिळालेल्या गुप्त माहितीच्या आधारे करण्यात आली. पोलीस अधीक्षकांच्या आदेशानुसार, एलसीबीने (Local Crime Investigation) मोहाडी हद्दीतून एका इसमाला ताब्यात घेतले होते. त्याची झडती घेतली असता त्याच्याकडे गुंगीकारक औषधाच्या बाटल्या आढळून आल्या. सदर बाटल्या जप्त करण्यात आल्यानंतर या बाटल्यांबाबत त्याच्याकडे चौकशी केली. देवपुरातील विष्णू नगरातील मेडिकलवर काम करणाऱ्या तरुणाकडून या बाटल्या आणल्याची माहिती त्याने पोलिसांना दिली.

त्यानुसार एलसीबीच्या पथकाने मेडिकलवरील तरुणालाही ताब्यात घेतलं, त्याच्याकडून देखील गुंगीकारक औषधांच्या बाटल्या हस्तगत करण्यात आल्या. यात वाडीभोर परिसरातील राहणाऱ्या एमआरचाही सहभाग असल्याची माहिती पथकाला मिळाली, त्यानुसार त्याचा देखील शोध पोलिसांनी घेतला असता त्याच्याकडेही गुंगीकारक औषधांच्या बाटल्यांचा साठा पोलिसांना आढळून आला. नशेच्या बाजारातील या चौघांच्या मुसक्या आवळल्यानंतर या रॅकेटमध्ये आणखी कोणी सहभागी आहे का? याचा तपास करत आहे.