अहिल्यानगर जिल्ह्यातील लोणी गावात एका तरुणाने सोशल मीडियावर झालेल्या बदनामीमुळे मृत्यूला कवटाळलं. ही घटना लोणी पोलिस ठाणे हद्दीत घडलीय. गोरक्षकांनी भररस्त्यात तरुणाला काही दिवसापूर्वी मारहाण केली होती. त्याचे फोटो सोशल मीडियावर व्हायरल केले होते. त्यात पोस्टमध्ये गोरक्षकांनी त्याला हिंदू दलाल म्हणूण संबोधलं होतं.

तरुणाची बदनामी झाल्यामुळे आत्महत्या केल्याने नातेवाईकांनी लोणी पोलीस ठाण्यात ठिय्या मांडला आहे. गुन्हा दाखल करून आरोपींना तात्काळ अटक करा, अशी नातेवाईकांची मागणी आहे. काही दिवसापूर्वी काही गोरक्षकांनी एका टेम्पो पकडला होता. त्या टेम्पोमध्ये गायी होत्या. तर सदर तरुण हा टेम्पो चालवत होता. गोरक्षकांनी चालक तरुणाला पकडून मारहाण केली. त्याचा व्हिडिओ बनवला. तो व्हिडिओ त्यांनी सोशल मीडियावर एका मजकुरासह व्हायरल केला. त्यानंतर तरुणाने आत्महत्या केली.

सोमनाथ वडीतके असे या तरुणाचे नाव आहे. तरुणाच्या नातेवाईकांनी लोणी पोलीस स्टेशनमध्ये ठिय्या मांडलाय. सोमनाथ हा गायींची तस्करी करत नव्हता. चुकीच्या माहितीतून त्याच्यावर हल्ला झाला. त्याला राजुरी रोडवर गाई सोडण्याचं भाडे मिळालं होतं. तो गाई सोडण्यासाठी जात होता. परंतु गोरक्षकांनी त्याला वाटेत अडवून त्याला मारहाण केली. त्याचे व्हिडिओ बनवले.

त्यातून तरुणाची बदनामी झाली. या बदनामीमुळेच सोमनाथने आत्महत्या केली असा आरोप नातेवाईकांनी केलाय. या आत्महत्या प्रकरणी आरोपींना तात्काळ अटक करावी अशी मागणीही त्यांनी केलीय.