Delhi Crime News : ब्रिटिश महिलेवर दिल्लीमध्ये सामूहिक बलात्कार झाल्याची धक्कादायक घटना उघडकीस आली. या प्रकरणी पोलिसांनी दोन जणांना बेड्या ठोकल्या आहेत. इन्स्टाग्रामवर ओळख झाल्यानंतर ब्रिटिश महिला त्याला भेटण्यासाठी भारतात आली होती. पण त्याच तरूणाने महिपालपूरमधील हॉटेलमध्ये तिच्यावर बलात्कार केला. एएनआय न्यूजने याबाबत वृत्त दिले आहे.

ब्रिटिश महिलेनं तिच्यासोबत भयंकर कृत्य घडल्यानंतर मित्राची दिल्ली पोलिसात तक्रार केली. त्यानंतर पोलिसांनी तात्काळ कारवाई करत दोन जणांना बेड्या ठोकल्या. ब्रिटिश महिला आणि आरोपीचा इन्स्टाग्रामवर ओळख झाली होती. आरोपी इन्स्टाग्रामवर रील्स करायचा. ब्रिटिश महिला आणि आरोपी यांच्यामध्ये चांगली मैत्री झाली होती. ब्रिटिश महिलेसोबत मित्राने बलात्कार केला, त्याच्यासोबत मित्रही होता. दोघांनी आळी पाळीने तिच्यावर अत्याचार केला. पोलिसांनी दोघांनाही बेड्या ठोकल्या आहेत. आरोपीचे नाव कैलाश असल्याचे समोर आले आहे.

आरोपीला इन्स्टाग्राम रील्स करण्याचे वेड -

ब्रिटिश महिलेने तक्रार केल्यानंतर पोलिसांनी संशयीत असणाऱ्या दोन जणांना बेड्या ठोकल्या आहेत. त्याशिवाय ब्रिटिश दूतावासात या घटनेची माहिती देण्यात आली आहे. दिल्ली पोलिसांनी सांगितले की, दिल्लीमधील महिपालपूर येथील एका हॉटेलमध्ये ब्रिटिश महिलेसोबत बलात्कार केल्याप्रकरणी २ जणांना ताब्यात घेण्यात आले आहे. छेडछाड आणि बलात्काराच्या आरोपाखाली त्याला ताब्यात घेतलं असून चौकशी सुरू आहे.

पोलिसांनी काय सांगितले ?

राजधानी दिल्लीमधील वसुंधरा मयूर विहारी येथील कैलाश याला इन्स्टाग्रावर रील्स तयार करण्याचे वेड आहे. काही महिन्यापूर्वी सोशल मीडियावर लंडन येथील महिलेसोबत त्याची ओळख झाली. ब्रिटिश महिला महाराष्ट्र आणि गोव्याला फिरण्यासाठी भारतात आली होती. त्यावेळी महिलेने कैलाशला भेटण्यासाठी गोव्यात बोलवले. पण कैलाशने वेळ नसल्याचे सांगत टाळले अन् तिलाच दिल्लीमध्ये बोलवले. दिल्लीमधील महिपालपूर येथील हॉटेलमध्ये ब्रिटिश महिलेनेच रूम बूक केली होती.