छत्तीसगड: काँग्रेस नेत्याने पत्नी आणि दोन मुलांसह आत्महत्या केल्याची धक्कादायक घटना छत्तीसगडमधून समोर आली आहे. छत्तीसगडच्या जांजगीर चांपा जिल्ह्यात घडलेल्या या घटनेने सर्वत्र खळबळ उडाली आहे. कर्जबाजारीपणामुळे हे टोकाचे पाऊल उचलल्याचे बोलले जात असून काळीज पिळवटून टाकणाऱ्या या घटनेने सर्वत्र हळहळ व्यक्त होत आहे.

छत्तीसगडमधून एक हृदयद्रावक बातमी समोर आली आहे. छत्तीसगडच्या जांजगीर-चंपा जिल्ह्यामध्ये एका काँग्रेस नेत्याने कुटुंबासह आत्महत्या केली आहे. काँग्रेस नेत्याने पत्नी आणि दोन मुलांसह विष प्राशन करून आत्महत्या केली आहे. या घटनेत मोठ्या मुलाचा जागीच मृत्यू झाला. तर काँग्रेस नेते, त्यांची पत्नी आणि लहान मुलाला गंभीर अवस्थेत बिलासपूरच्या सिम्स रुग्णालयात दाखल करण्यात आले होते, तेथे रविवारी (1 सप्टेंबर) सकाळी उपचारादरम्यान तिघांचाही मृत्यू झाला.

काँग्रेस नेते पंचराम यादव (६६ वर्षे), त्यांची पत्नी दिनेश नंदानी यादव (५५ वर्षे), मोठा मुलगा नीरज यादव (२८ वर्षे) आणि धाकटा मुलगा सूरज यादव (२५ वर्षे) अशी मृतांची नावे आहेत. या सर्वांनी 30 ऑगस्ट रोजी एकत्र विष प्राशन केले होते. या घटनेने परिसरात एकच खळबळ उडाली आहे. संपूर्ण कुटुंब कर्जात झाल्याने त्यांनी हे पाऊल उचलल्याचा संशय आहे.

जंजगीर नगरपालिकेत कंत्राटदार म्हणून काम करायचे. त्यांनी काही कर्ज घेतले होते, ते कर्ज चुकवता न आल्याने संपूर्ण कुटुंब तणावाखाली होते. याच नैराश्यातून हे टोकाचे पाऊल उचलल्याचे बोलले जात आहे. घटनेदिवशी यादव यांच्या कुटुंबाने कोणाला संशय येऊ नये म्हणून घराच्या मुख्य दरवाजाला बाहेरुन कुलूप लावले आणि मागच्या दाराने प्रवेश करत सामुहिक आत्महत्या केली.

घटनेनंतर शेजारील मुलगी त्यांच्या घराकडे आली मात्र फोन करुनही कोणीही दार उघडत नसल्याने त्यांना संशय आला आणि तिने आजूबाजूच्या लोकांना माहिती दिली. यानंतर शेजारी आणि नातेवाईक घरात गेले तेव्हा सर्वांनाच आश्चर्याचा धक्का बसला. पोलीस याबाबतचा अधिक तपास करत आहेत.