नातेसंबंधांची मर्यादा चिरडणारी एक धक्कादायक घटनेने संपूर्ण परिसर हादरला आहे. मध्यप्रदेशमध्ये दीराने स्वतःच्या वहिनीची निर्घृण हत्या केली. मिळालेल्या माहितीनुसार, खोहा येथील खेमचंद मालवीय सकाळी शेतात कामासाठी घराबाहेर गेले होते. घरात त्यांची पत्नी पूजा मालवीय (वय 32) ही आपल्या 8 वर्षांच्या मुलगा ऋतिकसोबत होती. सकाळी सुमारे साडेनऊच्या सुमारास पूजा स्वयंपाकघरात जेवण बनवत असताना तिचा दीर रामू मालवीय (वय 27) तिथे आला आणि तिला चहा बनवण्यास सांगितले. मात्र, काही कारणास्तव पूजाने चहा बनवण्यास नकार दिला.

चहा बनवण्यास नकार दिल्याने रामूचा संताप अनावर झाला. रागाच्या भरात त्याने जवळच असलेला दांडा उचलून पूजाच्या डोक्यावर घालत सलग वार केले. यामध्ये पूजा गंभीर जखमी झाली आणि खाली कोसळली. तिचा मृत्यू होईपर्यंत आरोपी तिचा नराधम दीर वार करत राहिला. घटनेनंतर दीर घराबाहेर आला. तेव्हा त्याचा मोठा भाऊ गणेशराम याने त्याला रक्ताने माखलेल्या अवस्थेत पाहिले. विचारणा केल्यावर त्याने शांतपणे मी वहिनीला मारलं असे सांगितले आणि घटनास्थळावरून पळ काढला.

काही तासांतच अटक

घटनेची माहिती मिळताच पोलीस निरीक्षक दिनेश सिंह रघुवंशी हे पथकासह घटनास्थळी दाखल झाले. पोलिसांनी पंचनामा करून मृतदेह सांची येथील शासकीय रुग्णालयात पाठवला. शवविच्छेदनानंतर मृतदेह नातेवाईकांच्या ताब्यात देण्यात आला. या प्रकरणी पोलिसांनी रामू मालवीय याच्याविरुद्ध खुनाचा गुन्हा दाखल करून काही तासांतच त्याला अटक केली. दरम्यान, या घटनेमुळे गावात शोककळा पसरली आहे.