Summary -

• दारू पार्टीदरम्यान झालेल्या वादातून महिलेची हत्या

• पाटणातील राजीव नगर येथे ही घटना घडली

• महिलेच्या नवऱ्याच्या मित्रांनीच हे भयंकर कृत्य केले

• आरोपींनी विटांनी ठेचून महिलेची हत्या केली

बिहारची राजधानी पाटणामधून हत्याकांडाची भयंकर घटना समोर आली आहे. दारू पार्टी करताना मित्रांमध्ये कडाक्याचे भांडण झाले. वाद इतका टोकाला गेला की यामधील काही तरुणांनी मित्राच्या बायकोची निर्घृण हत्या केली. ही घटना शहरातील राजीव नगर रोड क्रमांक २५ डी परिसरात घडली. दारू पार्टीदरम्यान महिलेच्या नवऱ्याचे मित्रांसोबत भांडण झाले. या भांडणानंतर आरोपीने महिलेची विटेने ठेचून हत्या केली. महिलेच्या हत्येनंतर सर्व आरोपी घटनास्थळावरून पळून गेले. पोलिस या प्रकरणाचा तपास करत आरोपींना अटक केली.

मिळालेल्या माहितीनुसार, ही घटना सोमवारी रात्री उशिरा घडली. मृत महिलेचे नाव प्रियांका कुमारी (२५ वर्षे) असे आहे. प्रियांका मूळची समस्तीपूर जिल्ह्यातील होती. प्रियांका गेल्या सात वर्षांपासून तिचा नवरा मेघनाथ शहा आणि सात वर्षांच्या मुलासह पाटणाच्या राजीवनगर येथे भाड्याच्या घरात राहत होती. घटनेच्या वेळी प्रियांकाचा पती त्याच्या मित्रांसोबत दारू पार्टी करत होता.

प्रियांकाचा पती मेघनाथ शहा आणि त्याचे मित्र घरात दारू पित होते. त्यांच्यात एखाद्या गोष्टीवरून वाद झाला. सुरुवातीला त्यांनी एकमेकांना शिवीगाळ केली. पण नंतर या वादाचे रुपांतर हाणामारीत झाले. हा वाद इतका वाढला की रागाच्या भरात आरोपींनी मेघनाथ शहाची बायको प्रियांकाची हत्या केली. आरोपींनी प्रियांकावर विटांनी हल्ला केला. या हल्ल्यात गंभीर जखमी झालेल्या प्रियांकाचा जागीच मृत्यू झाला. या घटनेमुळे पाटणामध्ये खळबळ उडाली.

या घटनेची माहिती मिळताच पोलिसांनी घटनास्थळी धाव घेतली. पोलिसांनी प्रियांकाचा मृतदेह ताब्यात घेत शवविच्छेदनासाठी रुग्णालयात पाठवला. प्रियांकाची हत्या केल्यानंतर आरोपींनी घटनास्थळावरून पळ काढला. यानंतर या प्रकरणी पोलिसांनी सर्व आरोपींविरोधात गुन्हा दाखल केला. पोलिसांनी या घटनेच्या काही तासांतच आरोपींना बेड्या ठोकल्या.