माणूस प्रेमात आंधळा होतो असं म्हणतात. याचं आंधळेपणात आपलं आणि परकं याचं भान देखील अनेकदा प्रेमी युगुलांना राहत नाही. आपल्या मनासारखं लग्न ठरत नसल्याने आणि दागिन्यांवरून झालेल्या वादानंतर एका सॉफ्टवेअर इंजिनिअरने स्वतःच्या कुटुंबातील ८ जणांवर चाकूने हल्ला केला. या हल्ल्यात एका महिलेचा मृत्यू झाला आहे तर ७ जण रुग्णालयात मृत्यूशी झुंज देत आहेत. या घटनेने परिसरात खळबळ उडाली असून आरोपीला पोलिसांनी अटक केली आहे. या प्रकरणी पोलीस अधिक तपास करत आहेत.

मिळालेल्या माहितीनुसार, आरोपीचे नाव दिपक कुमार असे आहे. दिपक हा बंगळूरु येथील एका नामांकित कंपनीत सॉफ्टवेअर इंजिनिअर म्हणून काम करतो आणि त्याला वर्षाला ४० लाख रुपये इतका पगार आहे. त्याचे त्याच कंपनीतील एका सहकारीसोबत प्रेमसंबंध होते. त्याला तिच्याशी लग्न करायचे होते. मात्र, त्याच्या कुटुंबीयांनी त्याच्या या इच्छेकडे दुर्लक्ष करून त्याचे लग्न दुसऱ्या मुलीशी ठरवले. दरम्यान दिपक १७ एप्रिल रोजी लग्नासाठी आपल्या गावी परतला, पण त्याच्या मनात द्वेषाची आग धगधगत होती.

दिपक गावी येण्यापूर्वीच दागिन्यांवरून कुटुंबात वाद सुरु होता. दिपकची मागणी होती की, सासरच्या मंडळींकडून त्याला १० लाख ते १२ लाख रुपये किमतीचे ब्रँडेड दागिने मिळावेत. हे प्रकरण इतके वाढले की यावरून पुन्हा वाद उफाळला. संतापलेल्या दिपकचा संयम सुटला. त्याने घरात ठेवलेला चाकू उचलून आपल्याच कुटुंबातील सदस्यांवर हल्ला केला.

दिपकने रागाच्या भरात वडील, काकासह घरातील ८ कुटुंबियांवर हल्ला केला. या हल्ल्यात दिपकच्या आत्येचा दुर्दैवी मृत्यू झाला तर, इतर ७ जण गंभीर जखमी असून त्यांच्यावर रुग्णालयात उपचार सुरु आहेत. धक्कादायक म्हणजे कुटुंबावर हल्ला केल्यानंतर दिपकने स्वतःवर देखील हल्ला करून घेतला. याप्रकरणी आजूबाजूच्या नागरिकांनी पोलिसांना माहिती दिली. पोलिसांनी तात्काळ घटनास्थळी दाखल होत दिपकला ताब्यात घेतले आहे. याप्रकरणी पोलीस अधिक तपास करत आहेत.