बेंगळुरुमधून धक्कादायक घटना समोर आली आहे. एका डॉक्टर पतीने बायकोची हत्या केल्याची खळबळजनक घटना समोर आली आहे. दोघांच्या लग्नाला अवघे ९ महिने झाले होते. डॉक्टर पतीच्या धक्कादायक कृत्याची सर्वत्र चर्चा होत आहे.

डॉक्टर कृतिका रेड्डी असे हत्या केलेल्या महिलेचे नाव आहे. डॉ. कृतिका ही स्किन स्पेशलिस्ट होती. तर तिचा पती डॉ. महेंद्र रेड्डी हा त्याचा रुग्णालयात जनरल सर्जन होता. कृतिका गेल्या काही दिवसांपासून आजारी होती. त्यामुळे ती वडिलांच्या घरी राहत होती. पती महेंद्र तिला अधूनमधून भेटायला यायचा. मात्र, डॉ. महेंद्रच्या डोक्यात काही वेगळंच शिजत होतं.

कृतिकाची अचानक तब्येत बिघडली. त्यानंतर महेंद्रने तिला आईव्ही इंजेक्शन दिले. मात्र, २३ एप्रिल रोजीच्या रात्री कृतिकाची तब्येत आणखी बिघडली. त्यानंतर तिला तातडीने रुग्णालयात दाखल करण्यात आलं. मात्र, डॉक्टरांनी तिला मृत घोषित केलं. त्यानंतर पोलिसांनी आकस्मिक मृत्यू म्हणून नोंद केली होती.

सहा महिन्यानंतर फॉरेन्सिक रिपोर्ट समोर आला. या रिपोर्टमध्ये कृतिकाच्या शरीरात अॅनेस्थीसिया ड्रग आढळलं. अॅनेस्थीसिया हे ऑपरेशन थिएटरमध्ये रुग्णांना शस्त्रक्रियेच्या आधी दिलं जातं. मात्र, डॉ. महेंद्रने हेतूपूर्वक कृतिकाला अॅनेस्थीसिया जास्त प्रमाणात दिलं होतं.

कृतिकाची बहीण डॉ. निकिती रेड्डी यांनी सुरुवातीला संशय व्यक्त केला होता. कृतिकाचा मृत्यू नैसर्गिकरित्या झाला नसल्याचं तिचा संशय होता. त्यानंतर पोलिसांनी तपास सुरु केला होता. तपासात खुलासा झाला आहे की, महेंद्र आणि त्याच्या कुटुंबावर याआधी अनेक गुन्हे दाखल झाले आहेत. महेंद्रच्या कुटुंबीयांनी लग्न जुळवण्याआधी या गोष्टी लपवल्या होत्या. पोलिसांनी या प्रकरणात डॉ. महेंद्र रेड्डी याला मणिपाल येथून अटक केली. महेंद्रला ताब्यात घेत चौकशी सुरु करण्यात आली आहे.