बंगळूरूमधून एक धक्कादायक बातमी समोर येत आहे. एका व्यक्तीने आपल्या पत्नीविरोधात पोलिसात धाव घेतली आहे. त्याने आरोप केला आहे की, त्याची पत्नी त्याला वारंवार अश्लील व्हिडिओ पाठवत होती आणि शारीरिक संबंध ठेवण्यास भाग पाडत होती. त्याने आपल्या सासरच्या मंडळींवरही वैवाहिक जीवनात हस्तक्षेप केल्याचा आरोप केला आहे.

काय आहे हे नेमकं प्रकरण?

नागरभावमध्ये राहत असलेल्या या व्यक्तीने बंगळूरुमध्ये एका खाजगी ऑफिसमध्ये काम करणाऱ्या शिल्पासोबत लग्न केले. लग्नानंतर तो जक्कुरूमध्ये एका व्हिलामध्ये राहायला गेला. त्याने आरोप केला आहे की, त्याची सासू आशा यांनी त्याच्या घरात येण्यावर निर्बंध घातले. मुलीसाठी चांगला मुलगा मिळावा म्हणून सासूने त्याला मुलीला सोडून देण्यास प्रवृत्त केले.

तक्रारदाराच्या मते, या सगळ्या प्रकारामुळे तो मानसिकदृष्ट्या त्रस्त झाला होता. त्याने असा आरोप केला आहे की, पत्नी त्याच्या आर्थिक परिस्थितीची चेष्टा करायची आणि तिच्या लाइफस्टाइलला तो सपोर्ट करू शकत नाही यावरून नाराजी व्यक्त करत असे. तसेच ती तिच्या श्रीमंत मित्रांसोबत वेळ घालवत होती. पार्टी आणि दारूचं सेवन अशा सवयींमध्ये ती रमलेली होती, असा दावाही त्याने केला आहे.

अश्लील व्हिडिओ पाठवून दबाव टाकल्याचा आरोप

यावेळी त्याने आपल्या पत्नीवर लैंगिक छळ केल्याचा आरोप केला आहे. तक्रारदाराच्या म्हणण्यानुसार, पत्नी त्याला वारंवार अश्लील व्हिडिओ पाठवत असे आणि तशा गोष्टी करण्यासाठी दबाव आणत होती.

इतकंच नाही तर तिने त्याला तिच्या एका मैत्रिणीसोबत शारीरिक संबंध ठेवण्यास भाग पाडल्याचा आरोपही करण्यात आला आहे. याशिवाय वैयक्तिक आयुष्यातील गोष्टी इतरांसोबत शेअर करण्याचा आग्रह देखील ती करायची. पत्नीने आपल्या माजी प्रियकरासोबत विवाहबाह्य संबंध असल्याची कबुली दिल्याचाही दावा तक्रारदाराने केला आहे.

कुटुंबासोबतही केली चर्चा

हा वाद याआधी दोन्ही कुटुंबांसमोर मांडण्यात आला होता. 4 जुलै 2024 रोजी फॅमिली मेडिएशनही करण्यात आलं होतं. मात्र, त्यातून कोणताही ठोस तोडगा निघाला नाही. पुढे 24 सप्टेंबर 2024 रोजी पतीला घरातून बाहेर काढण्यात आल्याचा आरोप आहे, तर पत्नीला तिची आई चेन्नईला घेऊन गेली.

घर सोडताना पतीला फक्त त्याचा युनिफॉर्म आणि लॅपटॉप घेऊन जाण्याची परवानगी देण्यात आली, असं त्याचं म्हणणं आहे. त्याने असाही आरोप केलाय की, घरात ठेवलेली 1.87 लाख रुपये रोख रक्कम, सोने-चांदीचे दागिने, पासपोर्ट, शैक्षणिक कागदपत्रं आणि इतर महत्त्वाच्या वस्तू त्याला देण्यात आल्या नाहीत.