बीड : बीडमधून सर्वात मोठी बातमी आता समोर आली आहे. बीड जिल्हा कारागृहातील महिला पोलीस कर्मचाऱ्यासह वरिष्ठ तुरुंग अधिकाऱ्याला निलंबित करण्यात आलं आहे. दक्षता पथकाच्या तपासणी दरम्यान गैरप्रकार आढळल्यामुळे ही कारवाई करण्यात आली आहे. अहवाल आल्यानंतर आज निलंबनाचे आदेश काढण्यात आले आहेत. या कारागृहात वाल्मीक कराडसह संतोष देशमुख खून प्रकरणातील आरोपी आहेत. कारागृह प्रशासनावर आरोप झाल्यानंतर वरिष्ठ कार्यालयाकडून गंभीर दखल घेण्यात आली आहे. वारंवार तपासणी केली जात असल्याचं देखील समोर आलं आहे. दरम्यान, सीमा गोरे असं निलंबित झालेल्या महिला पोलीस कर्मचाऱ्याचं नाव तर डी.डी. कवाळे असं वरिष्ठ तुरुंग अधिकाऱ्याचं नाव आहे. डी.डी.कवाळे यांनी नुकताच स्वीकारला पदभार स्वीकारला होता, मात्र आता त्यांच्यावर कारवाईचा बडगा उगारण्यात आला आहे.

दरम्यान, सायबर विभागातील बडतर्फ पोलीस उपनिरीक्षक रणजीत कासलेंनंतर आता त्याच विभागातील पोलीस निरीक्षकाला सेवेतून बडतर्फ करण्यात आलंय. सुनील नागरगोजे असे पोलीस निरीक्षकाचे नाव असून, पोलीस महासंचालक कार्यालयाने संबधित प्रकरणाची सुनावणी केल्यानंतर नागरगोजे यांच्यावर कठोर कारवाई करण्यात आलीय. तत्कालीन पोलीस अधीक्षक यांना शिवीगाळ करणे त्याचबरोबर कर्मचाऱ्यांना धमकावणे या कारणामुळे बडतर्फ करण्यात आल्याची माहिती समोर आली आहे.

सुनील नागरगोजे यांनी बीडचे तत्कालीन पोलीस अधीक्षक नंदकुमार ठाकूर यांच्याशी उद्धटपणे वागून शिवीगाळ केली होती, तसेच कार्यालयीन कर्मचाऱ्याला धमकावल्याची गंभीर तक्रारही त्यांच्या विरोधात होती. या गैरवर्तणुकीचा अहवाल नंदकुमार ठाकूर यांनी वरिष्ठांकडे सादर केला होता. या प्रकरणात पोलीस महासंचालक कार्यालयाने सुनावणी घेतल्यानंतर सुनील नागरगोजे यांना सेवेतून बडतर्फ केले आहे.

पोलीस निरीक्षक सुनील नागरगोजे यांना स्थानिक गुन्हे शाखेत पोस्टिंग हवी होती. यासाठी त्यांनी नेत्यांमार्फत दबावही टाकला. मात्र, पोलीस अधीक्षकांनी त्यांच्या मागणीकडे दुर्लक्ष केल्याने त्यांनी अधिकाऱ्यांना शिवीगाळ आणि धमक्या दिल्या, असा आरोप आहे.