पुण्यातील वैष्णवी हगवणे प्रकरणाची बीडमध्ये पुनरावृत्ती झाल्याची धक्कदायक घटना समोर आली आहे. पुण्यातील वैष्णवी हगवणे प्रकरणाची बीडमध्ये पुनरावृत्ती झाल्याची धक्कदायक घटना समोर आली आहे. बीड जिल्ह्याच्या गेवराई तालुक्यातील राजुरी मळा येथील २२ वर्षीय सोनाली बाळू वनवे हिला तिच्या सासरच्या लोकांनी पैशांची मागणी करत आत्महत्येस प्रवृत्त केल्याची घटना घडली आहे. याप्रकरणी पोलिसांनी सोनालीच्या सासरच्या मंडळींना बेड्या ठोकल्या आहेत.

मिळालेल्या माहितीनुसार, बीडच्या गेवराई तालुक्यातील राजुरी मळा येथील सोनाली बाळू वनवे हिचा जंबुरा वस्ती येथील अनिकेत गर्जे याच्यासोबत दोन महिन्यांपूर्वी विवाह झाला होता. अवघ्या एक महिन्यानंतर सासरच्या लोकांनी तिच्याकडे पाच लाख रुपयांची मागणी करायला सुरुवात केली. सोनाली हिच्या माहेरच्या लोकांनी पाच लाख रुपये नेऊन दिले. मात्र "मला आता तू आवडत नाहीस, मला तुझ्या सोबत राहायचे नाही" असा वाद घालत नवऱ्यासह सासरच्या लोकांकडून वारंवार त्रास दिला जात होता.

याबाबतची माहिती सोनालीने तिच्या आईला आणि माहेरच्या लोकांना दिली होती पण तिचा त्रास कमी झाला नाही. अखेर ३१ ऑगस्ट रोजी सोनाली बेपत्ता झाली आणि तिचा शोध घेतला असता सासरी तिच्या घराशेजारीच असलेल्या एका विहिरीत तिचा मृतदेह आढळून आला. मृतदेहावर अनेक ठिकाणी जखमा असल्याचं पोलीस पंचनाम्यात नमूद करण्यात आलं आहे.

दरम्यान तलवाडा पोलीस ठाण्यात आत्महत्येस प्रवृत्त केल्याप्रकरणी नवरा अनिकेत गर्जे, सासरा एकनाथ गर्जे, सासु प्रतिभा गर्जे यांच्या विरोधात गुन्हा दाखल करण्यात आला आहे. पोलिसांकडून अधिकचा तपास सुरू करण्यात आला आहे.

हुंडाबळीच्या घटनांनी राज्यात वारंवार डोके वर काढले आहे. या प्रकरणामुळे पुन्हा एकदा हुंडाबळीविरोधी कायद्याची कठोर अंमलबजावणी करण्याची मागणी पुढे येत आहे. सोनालीच्या मृत्यूनंतर तिच्या कुटुंबावर शोककळा पसरली असून त्यांनी दोषींना कठोर शिक्षा व्हावी, अशी मागणी केली आहे.