अमर घटारे, साम टीव्ही, प्रतिनिधी

Amravati News : अमरावतीमध्ये एक धक्कादायक घटना घडली. अमरावतीच्या हरिद्वापूर येथील महानुभाव पंथाच्या आश्रमात एका १७ वर्षीय अल्पवयीन तरुणीवर लैंगिक अत्याचार झाल्याची माहिती उघडकीस आली आहे. या प्रकरणी पोलिसांनी मुलीच्या मावशीसह दोघांना ताब्यात घेतले आहे. या प्रकरणातील चौथा आरोपी हा पीडितेचा सख्खा मामा असल्याचे पोलिसांनी म्हटले आहे.

मिळालेल्या माहितीनुसार, अमरावती जिल्ह्यातील रिद्धपूर येथील सुरेंद्रमुनी तळेगावकर महाराजांच्या मठात सेवेकरी असणाऱ्या १७ वर्षीय अल्पवयीन मुलीवर आरोपींनी अत्याचार केला. आरोपी मागील वर्षभरापासून पीडितेवर तळघरात अत्याचार करत होते. यात मुलीच्या मावशीने आरोपींना सहकार्य केले. पीडितेला ८ महिन्यांची गर्भधारणा झाल्याने हा प्रकार उघडकीस आला.

घटनेची माहिती मिळताच अल्पवयीन तरुणीच्या आईवडिलांनी शिरखेड पोलीस ठाण्यात तक्रार नोंदवली. पोलिसांनी या प्रकरणात सुरेंद्र मुनी आणी बाळकृष्ण देसाई या दोघांना अटक केली. शिवाय तरुणीच्या मावशीला देखील ताब्यात घेतले. अधिक चौकशी केल्यानंतर मुलीच्या ३५ वर्षीय सख्ख्या मामानेदेखील तिचे शोषण केल्याचे निष्पन्न झाले.

पोलिसांनी अत्याचार प्रकरणी आरोपींवर पॉक्सो कायद्याच्या अंतर्गत गुन्हा नोंदवला आहे. चारही आरोपींनी पोलिसांनी अटक केली आहे. या गंभीर प्रकरणाचा पुढील तपास सुरु असल्याचे पोलीस अधीक्षक विशाल आनंद यांनी सांगितले आहे. दरम्यान मठामध्ये झालेल्या या किळसवाण्याप्रकारामुळे परिसरात खळबळ उडाली आहे.