सुशील थोरात, साम टीव्ही, प्रतिनिधी

Ahilya Nagar Crime News : अहिल्यानगरमध्ये एक कूर घटना घडली आहे. अहिल्यानगरच्या शेवगाव तालुक्यातील बोधेगाव येथील पहिलवान बाबा मंदिराचे सेवेकरी यांची हत्या करण्यात आली. त्यांचे शिर धडावेगळे करण्यात आले. त्यानंतर मारेकऱ्यांनी एका विहिरीमध्ये त्यांचे शिर, तर दुसऱ्या विहिरीमध्ये धड फेकून दिल्याची माहिती पोलिसांनी दिली आहे.

पोलिसांनी दिलेल्या माहितीनुसार, मृत सेवेकरी व्यक्तीचे नाव नामदेव दहातोंडे (वयवर्ष ७०) असे आहे. ते मागील पंधरा वर्षांपासून बोधेगावच्या पहिलवान बाबा मंदिरात साफसफाईचे काम करत होते. २६ जानेवारीपासून ते बेपत्ता होते. तेव्हा मंदिराचे पुजारी एकनाथ घोरतळे यांनी बेपत्ता असल्याची तक्रार पोलीस ठाण्यात केली.

दरम्यान मंदिराच्या शेजारच्या विहिरीतून दुर्गंध यायला लागला. जवळ गेल्यावर पाण्यावर धड नसलेले शिर तरंगत असल्याचे पाहायला मिळाले. घटनास्थळी पोहोचत पोलिसांनी शिराचे धड शोधायला सुरुवात केली. तपास सुरु असताना मंदिरापासून काही अंतरावर एका विहिरीत वास येत असल्याचे पोलिसांच्या निदर्शनास आले.

पोलिसांना विहिरीत पुरलेल्या अवस्थेत धड आढळले. पुढे तपासादरम्यान हे शिर आणि धड सेवेकरी नामदेव दहातोंडे यांचे असल्याची माहिती पोलिसांनी दिली. त्यांची हत्या का आणि कोणी केली याचा तपास स्थानिक पोलीस करत आहेत. दरम्यान या क्रूर घटनेमुळे परिसरात भीतीचे वातावरण निर्माण झाले आहे.