PM Kisan Yojana : सरकार शेतकऱ्यांना आर्थिक मदत मिळावी यासाठी विविध योजना राबवत आहे. त्यातीलच पीएम किसान योजनेचा लाभ ऑक्टोबर महिन्यात येण्याची शक्यता आहे, अशी सुत्रांनी माहिती दिली आहे. पण या योजनेसंदर्भात आणखी एक धक्कादायक माहिती समोर आली आहे. एका कुटुंबातून पती आणि पत्नी दोघांच्याही नावावर योजनेचा लाभ घेतला जास असल्याची जवळपास १,२०० प्रकरणं आढळली आहेत.

शासनाच्या नियमानुसार, एका कुटुंबातल्या पात्र शेतकऱ्यालाच प्रधानमंत्री किसान सन्मान निधी योजनेचा लाभ मिळणं अपेक्षित आहे. मात्र, फार्मर रजिस्ट्रीच्या प्रोसेसदरम्यान काही कुटुंबांमध्ये नवरा आणि बायको या दोघांच्याही नावावर योजनेचा लाभ सुरू असल्याचं उघडकीस आलं. त्यामुळे संबंधित प्रकरणं आता विभागीय तपासणीसाठी वेगळी करण्यात आली आहेत.

३.१४ लाख शेतकऱ्यांची फार्मर रजिस्ट्री पूर्ण

जिल्ह्यामध्ये आतापर्यंत एकूण ४.०७ लाख शेतकरी नोंदणीकृत आहेत. त्यापैकी आतापर्यंत ३.१४ लाख शेतकऱ्यांची फार्मर रजिस्ट्री पूर्ण झाली आहे. या प्रोसेसदरम्यान शेतकऱ्यांच्या विविध कागदपत्रांची आणि उपलब्ध नोंदींची पडताळणी केली जातेय.

याच तपासणीमध्ये एकाच कुटुंबातल्या नवरा-बायको अशा दोघांचीही नावं पीएम किसान योजनेच्या लाभार्थी यादीत असल्याची माहिती समोर आली. त्यानंतर संबंधित लाभार्थ्यांचा डेटा स्वतंत्रपणे तपासणीसाठी ठेवण्यात आला आहे.

कागदपत्रांची पुन्हा तपासणी होणार

विभागाकडून आता संबंधित शेतकऱ्यांच्या कागदपत्रांसह योजनेच्या पात्रतेची पुन्हा पडताळणी केली जात आहे. तपासणीनंतर कोण पात्र आहे आणि कोण नियमांच्या विरोधात लाभ घेत आहे, हे स्पष्ट होणार आहे.

जर एखाद्या कुटुंबात नवरा- बायको मिळून नियमांनुसार अपात्र आढळलं किंवा दोघांच्या नावावर लाभ घेणं नियमबाह्य असल्याचं सिद्ध झालं, तर निर्धारित प्रोसेसनुसार एका लाभार्थ्याचे नाव योजनेतून हटवलं जाऊ शकतं.

फार्मर रजिस्ट्री पूर्ण झाल्यावर पात्र लाभार्थ्यांची यादी जास्त अचूक करण्यासाठी ही प्रोसेस महत्त्वाची ठरणार आहे. त्यामुळे पीएम किसानचा लाभ घेणाऱ्या शेतकऱ्यांनी आपल्या नोंदी आणि कागदपत्रांमध्ये कोणतीही विसंगती असेल तर ती वेळेत दुरुस्त करून घेणं आवश्यक आहे.