महिन्याचा पहिलाच दिवस LPG ग्राहकांसाठी आनंदाचा ठरला आहे. १ ऑगस्टपासून व्यवसायिक एलपीजी सिलेंडर स्वस्त झाला असून घरगुती एलपीजी सिलेंडरच्या दरात कोणताही बदल करण्यात आलेला नाही. व्यापाऱ्यांना याचा मोठा दिलासा मिळाला आहे. दरम्यान आता घरगुती सिलेंडर कधी स्वस्त होणार याकडे गृहिणींचे लक्ष लागले आहे.

इंडियन ऑईलने जाहीर केलेल्या नव्या दरांनुसार, दिल्लीमध्ये १९ किलोचा व्यावसायिक सिलेंडर तब्बल १९२ रुपयांनी स्वस्त होऊन २,७३८ रुपयांवर आला आहे. पटणामध्ये त्याची किंमत ३,२२७ रुपयांवरून ३,०१८ रुपये झाली असून, लखनऊमध्ये हा सिलेंडर ३,०५२.५० रुपयांवरून २,८६०.५० रुपयांवर उपलब्ध होणार आहे. सलग दुसऱ्या महिन्यात व्यावसायिक सिलेंडर स्वस्त झाल्याने हॉटेल, रेस्टॉरंट आणि इतर व्यावसायिक क्षेत्रांना मोठा दिलासा मिळाला आहे.

दुसरीकडे, उज्ज्वला योजनेच्या काही लाभार्थ्यांसाठी मात्र ऑगस्ट महिन्यापासून एलपीजी महागणार आहे. १ एप्रिल ते ३१ जुलैदरम्यान चार अनुदानित सिलेंडरचे रिफिल पूर्ण केलेल्या लाभार्थ्यांना यापुढे ३०० रुपयांचे अनुदान मिळणार नाही. त्यामुळे त्यांना सर्वसामान्य ग्राहकांप्रमाणे पूर्ण किंमत मोजावी लागेल. यापूर्वी या योजनेत सिलेंडरवर अनुदान मिळत होते; मात्र यंदाच्या आर्थिक वर्षापासून ते केवळ चार सिलेंडरपर्यंत मर्यादित करण्यात आले आहे.

घरगुती सिलेंडरच्या दरांमध्ये कोणताही बदल नसून मुंबईमध्ये १४.२ किलोचा सिलेंडर ९४१.५० रुपयांना उपलब्ध आहे. बेंगळुरूमध्ये ९४४.५० रुपये, अहमदाबाद आणि गुरुग्राममध्ये ९४९ रुपये, जयपूरमध्ये ९५२.५० रुपये, चेन्नईमध्ये ९५७.५० रुपये, कोलकात्यात ९६८ रुपये, लखनऊमध्ये ९७६.५० रुपये, तर हैदराबादमध्ये त्याची किंमत ९९४ रुपयांवर कायम आहे.