राज्यात गेल्या वर्षभरापासून लाडकी बहीण योजनेची अंमलबजावणी सुरु आहे. दुसरीकडे योजनेतील काही अपात्र महिलांचे अर्ज बाद करण्यात येत आहे. आता फक्त पात्र लाडक्या बहिणींना योजनेचे महिन्याला १५०० रुपये मिळणार आहेत. या लोकप्रिय योजनेचा लाभ कायम ठेवण्यासाठी लाभार्थी महिलांना ई-केवायसी प्रक्रिया पूर्ण करावी लागणार आहे. तर योजनेतील लाखो अपात्र महिलांचं नाव यादीतून वगळण्यात आलं आहे.

लाडकी बहीण योजनेतील अपात्र महिलांना शोध घेण्यासाठी अंगणवाडी सेविकांकडून घरोघरी जाऊन पडताळणी केली जात आहे. एकाच कुटुंबात दोनहून अधिक महिलांना लाभ घेता येणार नाही. त्यामुळे योजनेचा लाभ कोणी घ्यायचा यावरून कुटुंबामध्ये महाभारत रंगल्याचंही दिसत आहे.

'लाडकी'वरून घरात महाभारत

सरकारच्या लाडकी बहीण योजनेच्या १५०० रुपयांवर पाणी कोण सोडणार, यावरून सासू-सून आणि जाऊबाईमध्ये वाद वाढल्याचंही पाहायला मिळत आहे. राज्यातील विविध भागात गेल्या काही महिन्यांपासून अंगणवाडी सेविकांच्या मदतीने पडताळणीचं काम सुरु झालंय. त्यानंतर राज्यातील लाखो अपात्र महिलांना लाभ मिळणे बंद झाले आहेत.

अपात्र ठरवण्याचे नियम काय?

एकाच कुटुंबातील दोनहून अधिक महिला लाभार्थी

एका कुटुंबातील दोन महिलांनाच या योजनेचा लाभ घेण्याची अनुमती आहे. परंतु २ पेक्षा जास्त महिलांना या योजनेचा लाभ दिला जाणार नाही.

शासकीय कर्मचारी

योजनेचा लाभ घेणारी व्यक्ती ही शासकीय/ निमशासकीय सेवेत कार्यरत आहेत. ती व्यक्ती अपात्र ठरणार आहे. सरकारची ही योजना फक्त अशासकीय किंवा गरजू लाभार्थ्यांसाठी आहे.

चारचाकी वाहन असणे

लाडकी बहीण योजनेचा लाभ घेणारी महिलेच्या नावावर चारचाकी वाहन असल्यास, ती व्यक्ती अपात्र मानली जाते.

वयाची अट

योजनेच्या लाभार्थ्यांचं वय २१ ते ६५ वर्षांच्या दरम्यान असणे आवश्यक आहे. परंतु वयाच्या अटीनुसार कमी किंवा जास्त वयाच्या व्यक्तींना लाभ दिला जात नाही.