राज्य सरकारने सर्व वाहनांना एचएसआरपी नंबरप्लेट बसवणे अनिवार्य केले आहे. एचएसआरपी नंबरप्लेट न बसवल्यास वाहनधारकांच्या खिशाला चांगलाच फटका बसणार आहे. आता एचएसआरपी नंबरप्लेट न बसवलेल्या वाहनांना दंड भरावा लागणार आहे. याबाबत परिवहन विभागातील अधिकाऱ्यांनी माहिती दिली आहे.

या तारखेपासून भरावा लागणार दंड

महाराष्ट्र परिवहन विभागाचे अधिकारी विवेक भिमानवर यांनी याबाबत माहिती दिली आहे. ज्या वाहनांना एचएसआरपी नंबरप्लेट बसवलेली नाही. त्यांना १८ फेब्रुवारीपासून दंड भरावा लागणार आहे. इंडियन एक्सप्रेसने याबाबत वृत्त दिले आहे.

एचएसआरपी नंबरप्लेट बसवण्यासाठी शेवटची तारीख ३१ डिसेंबर २०२५ होती. याआधीही चार वेळा मुदतवाढ देण्यात आली होती. त्यानंतर एकदाही मुदत वाढवण्यात आलेली नाही. त्यामुळे ज्यांनी मुदतीपूर्वी नंबरप्लेट बसवलेली नाही त्यांना चांगलाच फटका बसणार आहे.

परिवहन अधिकाऱ्यांनी दिलेल्या माहितीनुसार, ज्यांनी ३१ डिसेंबरआधी रजिस्ट्रेशन केले होते. त्यांना आतापर्यंत नंबरप्लेट भेटल्या आहेत. आता १८ फेब्रुवारीपासून एचएसआरपी नसलेल्या वाहनांविरोधात कारवाई केली जाणार आहे. ज्यांनी ३१ डिसेंबरआधी अपॉइंटमेंट बुक केली असेल त्यांना दंड भरावा लागणार नाहीये. परंतु अजूनही नंबरप्लेट न बसवलेल्यांना फटका बसणार आहे.

दंड किती भरावा लागणार?

एचएसआरपी नंबरप्लेट न बसवल्यास १००० रुपये दंड भरावा लागणार आहे. पुढे हा दंड १०,००० रुपयांपर्यंत वाढू शकतो,सध्या तरी जास्त दंड आकारण्याबाबत कोणताही निर्णय झालेला नाही. नागरिकांना एचएसआरपी नंबरप्लेट बसवण्यासाठी योग्य कालावधी देण्यात आला होता, असं आरटीओ अधिकारी विनायक सखरे यांनी सांगितलं आहे.