आधारकार्ड आजच्या काळात आपल्या प्रत्येक लहान-मोठ्या कामासाठी अत्यंत महत्त्वाचे ओळखपत्र बनले आहे. मात्र, आधारकार्डवरील नावामध्ये काही चूक झाली असेल किंवा नाव बदलायचे असेल, तर आता चिंता करण्याची गरज नाही. कारण युनिक आयडेंटिफिकेशन अथॉरिटी ऑफ इंडियाने (UIDAI) नाव बदलण्याची आणि दुरुस्त करण्याची प्रक्रिया अधिक सोपी केली आहे. लग्नानंतरचे आडनाव बदलण्यापासून ते स्पेलिंगमधील चूक सहज कशी ठीक करायची, याची सोपी माहिती जाणून घेऊया...

आधार केंद्रावर जाऊन हे काम करा

आधार सेवा केंद्रावर जाऊन आधार अपडेट फॉर्म भरावा लागतो. या अर्जात तुमचे नवीन आणि योग्य नाव टाकावे लागेल. आवश्यक कागदपत्रांची तपासणी केल्यानंतर तुमची अपडेट विनंती नोंदवली जाते. त्यानंतर तुम्हाला एक URN असलेली पावती दिली जाते, ज्याद्वारे तुम्ही तुमच्या अर्जाची स्थिती ट्रॅक करू शकता.

लग्नानंतर नाव किंवा आडनाव बदलणे

लग्नानंतर नाव किंवा आडनाव बदलण्यासाठी वैध कागदपत्रे सादर करावी लागतात (उदा. मॅरेज सर्टिफिकेट किंवा गॅझेट नोटिफिकेशन). योग्य पुराव्यांच्या आधारे आधारकार्डवरील आडनाव किंवा नाव सहज अपडेट करता येते.

घटस्फोटानंतरही आधारमध्ये नाव बदलता येते

घटस्फोटानंतर नाव बदलण्याची आवश्यकता असल्यास, संबंधित कागदपत्रांच्या आधारे अपडेट करण्याची प्रक्रिया पार पाडली जाऊ शकते. याचा अर्थ असा की, विवाह किंवा घटस्फोट यांसारख्या जीवनातील बदलांमुळे होणाऱ्या नाव बदलांसाठी UIDAI च्या नवीन प्रक्रियेत स्वतंत्रपणे तरतूद करण्यात आली आहे.

किरकोळ स्पेलिंगच्या चुकाही दुरुस्त केल्या जाऊ शकतात

आधारकार्डमध्ये नाव चुकीचे लिहिले असल्यास, प्रत्येक वेळी संपूर्ण नाव बदलण्याची प्रक्रिया पुन्हा करण्याची गरज नाही. नवीन एसओपीनुसार 'मायनर नेम चेंज' अंतर्गत विविध दुरुस्त्या करण्याची परवानगी आहे. कधीकधी, व्यक्ती नोंदणीच्या वेळी योग्य कागदपत्रे सादर करतात, परंतु आधारकार्डमध्ये नाव नोंदवताना डेटामध्ये चुका होतात. अशा प्रकरणांमध्येही, नाव दुरुस्त करण्याची तरतूद आहे.

किती वेळा नाव बदलता येते?

UIDAI च्या सध्याच्या नियमांनुसार, सामान्य प्रक्रियेअंतर्गत आधारकार्डमध्ये नाव दोनदा अपडेट करता येते. यानंतर नाव बदलण्याची आवश्यकता भासल्यास विशेष प्रक्रियेचे पालन करणे आवश्यक आहे. अशा परिस्थितीत, आधार केंद्रावर विनंती पत्र सादर केल्यानंतर, तुम्हाला URN सह UIDAI शी संपर्क साधण्याची गरज पडू शकते.

आधार कार्डमध्ये तुमचे नाव अपडेट करण्यासाठी किती शुल्क आकारले जाते?

सध्याच्या UIDAI शुल्कानुसार, नाव, लिंग, जन्मतारीख, पत्ता, मोबाईल नंबर किंवा ईमेल यांसारखी जनसांख्यिकीय माहिती स्वतंत्रपणे अद्ययावत करण्यासाठी 75rs शुल्क आकारले जाते.