दिवाळीच्या तोंडावर मुंबईतल्या कर्मचाऱ्यांसाठी आनंदाची बातमी समोर आली आहे. मुंबई महापालिकेच्या अधिकारी आणि कर्मचाऱ्यांना ३३ हजार रुपयांचा बोनस जाहीर झाल्यानंतर आता बेस्टच्या कर्मचाऱ्यांनाही ३३ हजार रुपये बोनस देण्याची तयारी सुरू झाली आहे. बेस्ट समितीच्या अध्यक्षा तृष्णा विश्वासराव यांनी याबाबत माहिती दिली आहे. दुसरीकडे, मुंबई महापालिकेअंतर्गत काम करणाऱ्या आशा स्वयंसेविकांनाही दिवाळीनिमित्त प्रत्येकी ५ हजार रुपयांचे सानुग्रह अनुदान देण्याची घोषणा करण्यात आली आहे.

बेस्ट कर्मचाऱ्यांना ३३ हजारांचा बोनस मिळणार?

मुंबई महापालिकेच्या ९० हजार अधिकारी आणि कर्मचाऱ्यांना यंदा दिवाळीसाठी ३३ हजार रुपये बोनस जाहीर करण्यात आलेला आहे. महापौर रितू तावडे यांनी कामगार संघटनांशी चर्चा केल्यानंतर बुधवारी ही घोषणा केलेली आहे.

मात्र, तोट्यात असलेल्या बेस्ट उपक्रमातल्या कर्मचाऱ्यांना बोनस जाहीर न झाल्याने त्यांच्यात नाराजी होती. आता बेस्ट समितीच्या अध्यक्षा तृष्णा विश्वासराव यांनी बेस्ट कर्मचाऱ्यांनाही ३३ हजार रुपये बोनस देण्यात येईल, अशी माहिती दिली आहे. यासाठी उपमुख्यमंत्री एकनाथ शिंदे यांच्याशी चर्चा करून त्यांच्या निर्देशानुसार लवकरच निर्णय घेतला जाणार आहे.

विशेष म्हणजे, गेल्या वर्षीही मुंबई महापालिका आणि बेस्ट कर्मचाऱ्यांना प्रत्येकी ३१ हजार रुपये बोनस देण्यात आला होता. त्यामुळे यंदाही कर्मचाऱ्यांना बोनसची अपेक्षा होती.

बेस्टकडे निधीची कमतरता

बेस्ट उपक्रम आर्थिक अडचणीत असल्याने बोनस देण्याचा प्रश्न निर्माण झालेला होता. मुंबई महापालिकेने यंदाच्या अर्थसंकल्पात बेस्टसाठी १ हजार कोटी रुपयांचा निधी जाहीर केला आहे. त्यापैकी ५०० कोटी रुपये बेस्टच्या निवृत्त कर्मचाऱ्यांची थकीत देणी देण्यासाठी वापरण्यात आले आहेत. उर्वरित ५०० कोटी रुपयांमधून इतर देणी देण्याची प्रोसेस सुरू असून कर्मचाऱ्यांच्या बोनसबाबतही निर्णय घेतला जाणार आहे.