सोनं-चांदी खरेदी करणाऱ्यांसाठी दिलासादायक बातमी समोर आली आहे. आज जळगावच्या सुवर्णनगरीत सोनं-चांदीच्या दरात मोठी घसरण झाली आहे. आज 10 ग्रॅम सोन्याचा दर 1 लाख 41 हजार रुपये, तर किलो चांदीचा दर 2 लाख 22 हजार रुपये इतका नोंदवला गेला. विशेष म्हणजे, एका दिवसात सोन्याच्या दरात 1 हजार रुपयांची, घसरण झाली आहे. गेल्या सात दिवसांचा विचार केला तर सोनं 5 हजार रुपयांनी स्वस्त, तर चांदी तब्बल 16 हजार रुपयांनी घसरली आहे.

सराफा व्यावसायिकांच्या मते, अमेरिका-इराणमधील युद्धजन्य परिस्थिती आणि आंतरराष्ट्रीय बाजारातील अनिश्चिततेचा परिणाम मौल्यवान धातूंच्या दरावर होत आहे. त्यामुळे सध्या दरात चढ-उतार सुरू आहेत.सराफा तज्ज्ञांचा अंदाज आहे की, जोपर्यंत युद्धजन्य परिस्थिती कायम राहील तोपर्यंत सोन्याच्या दरावर दबाव राहू शकतो. मात्र परिस्थिती निवळल्यानंतर सोन्याच्या किमती पुन्हा वाढण्याची शक्यता आहे.

दरम्यान, दीर्घकालीन दृष्टीने सोने आणि चांदीमध्ये गुंतवणूक करणाऱ्या गुंतवणूकदारांना चांगला परतावा मिळू शकतो, असे मतही सराफा तज्ज्ञांनी व्यक्त केले आहे.

Goodreturn नुसार, आज 24 कॅरेट 10 तोळं सोन्याच्या किंमतीत 1,100 रुपयांची घसरण झाली आहे. २४ कॅरेट सोन्याच्या एक तोळ्याचा भाव 1 लाख 42 हजार 800 रुपयांवर पोहोचला आहे. चांदीच्या दरात मात्र आज कोणताही बदल झालेला नाही. 100 ग्रॅम चांदीचा दर कालप्रमाणेच 23 हजार 500 रुपये इतकाय कायम आहे. तुम्ही सोनं- चांदी खरेदी करत असाल किंवा त्यामध्ये गुंतवणूक करत असाल तर ही माहिती तुमच्यासाठी खूप फायदेशीर ठरू शकते.