EPFO धारक कोट्यवधी सदस्यांसाठी एक अत्यंत मोठी आणि दिलासा देणारी बातमी आहे. आतापर्यंत पीएफचे पैसे काढण्यासाठी लांब लचक प्रक्रियेला सामोरे जावे लागत होते. परंतु आता ही प्रक्रिया पूर्णपणे बदलणार आहे. ईपीएफओ लवकरच एटीएममधून पीएफचे पैसे काढण्याची सुविधा सुरू करणार आहे. यामुळे भविष्यात तुम्हाला तुमच्या पीएफचे पैसे काही मिनिटांत थेट एटीएममधून काढता येणार आहेत.

ईपीएफओचे देशभरात सुमारे ७ कोटींहून अधिक सदस्य आहेत. या नवीन सुविधेमुळे या सर्व खातेधारकांना मोठा फायदा होणार आहे. मिळालेल्या माहितीनुसार, ईपीएफओ जानेवारी २०२६ पासून एटीएममधून पीएफचे पैसे काढण्याची ही सुविधा सुरु होणार आहे. ही सुविधा सुरू झाल्यानंतर आपत्कालीन परिस्थितीत पैशांसाठी खूप दिवस वाट पाहावी लागणार नाही. काही मिनिटांतच तुमच्या हातात पैसे मिळतील.

एटीएममधून पीएफचे पैसे काढण्याची तांत्रिक तयारी पूर्ण झाली आहे. मात्र, या सुविधेच्या पद्धती आणि पैसे काढण्याची मर्यादा या सगळ्या गोष्टींवर चर्चा होणे बाकी आहे. पुढील महिन्यात होणाऱ्या सीबीटीच्या बैठकीत या मुद्द्यांवर चर्चा केली जाईल. या बैठकीनंतर या नवीन सुविधेला अंतिम मंजुरी मिळण्याची शक्यता आहे.

ईपीएफओची ही नवीन सुविधा सुरू झाल्यानंतर तुम्ही तुमच्या सामान्य डेबिट कार्डमधून ज्याप्रमाणे पैसे काढता त्याचप्रमाणे एटीएममधून पीएफचे पैसे काढू शकाल. यासाठी तुम्हाला ईपीएफओकडून एक नवीन विशेष कार्ड दिले जाणार आहे. या कार्डच्या मदतीने तुम्ही काही मिनिटांत तुमची पीएफची रक्कम मिळवू शकणार आहेत. याशिवाय तुम्हाला UPI द्वारे देखील पीएफचे पैसे काढता येणार आहे. यासाठी तुम्हाला तुम्हाला तुमचे पीएफ खाते UPI शी लिंक करावे लागेल.

सध्याच्या पीएफ काढण्याच्या नियमानुसार, तुमची नोकरी काही कारणास्तव गेली, तर तुम्ही एका महिन्यानंतर तुमच्या पीएफ खात्यातून ७५ टक्के पैसे काढू शकता. उर्वरित २५ टक्के रक्कम नोकरी सोडल्यानंतर दोन महिन्यांनी काढता येते. पीएफ क्लेमची स्थिती तपासण्यासाठी तुम्ही ईपीएफओ डॅशबोर्डवर जाऊन 'ट्रॅक क्लेम स्टेटस' वर क्लिक करू शकता. तुमचा दावा निकाली निघालेला दिसत असेल, तर तुमच्या पीएफचे पैसे मंजूर झाले आहेत आणि ते तुम्ही ईपीएफओ पासबुकमध्ये देखील तपासू शकता.