केंद्र सरकारी कर्मचाऱ्यांसाठी महत्त्वाची अपडेट समोर आली. दिवाळी संपला तरीही आठव्या वेतन आयोगाने पगारवाढीची घोषणा केलेली नाही. अशातच कर्मचारी संघटनेने वेतन, पेन्शन आणि भत्त्यांमध्ये मोठे बदल करण्याची मागणी केली. यामध्ये सध्याची १८ हजार रुपये बेसिक सॅलरी ६९ हजार रुपये करण्याचा प्रस्ताव आहे. तसेच पेन्शन ५० टक्क्यांवरून ६७ टक्के आणि वार्षिक इन्क्रिमेंट ३ टक्क्यांवरून ६ टक्के करण्याची मागणी करण्यात आली आहे.

बेसिक पगार १८ हजारांवरून ६९ हजार करण्याची मागणी

केंद्रीय कर्मचाऱ्यांची प्रमुख संघटना नॅशनल कौन्सिल (स्टाफ साइड) जॉइंट कन्सल्टेटिव्ह मशिनरी (NC-JCM) यांनी आठव्या वेतन आयोगाकडे आपल्या शिफारशी सादर केल्या होत्या. यामध्ये बेसिक सॅलरी १८ हजारांवरून ६९ हजार रुपये करण्याची मागणी करण्यात आली आहे. यासाठी ३.८३३ फिटमेंट फॅक्टर प्रस्तावित करण्यात आला. तसेच पे-लेव्हल २ आणि ३ एकत्र करून नवीन वेतनश्रेणी तयार करण्याची मागणीही करण्यात आली.

पेन्शन ६७ टक्के आणि इन्क्रिमेंट ६ टक्के करण्याचा प्रस्ताव

रिटायर झालेल्या कर्मचाऱ्यांना शेवटच्या सॅलरीच्या ५० टक्क्यांऐवजी ६७ टक्के पेन्शन देण्याची मागणी करण्यात आलीये. तर फॅमिली पेन्शन ३० टक्क्यांवरून ५० टक्के करण्याचा प्रस्ताव केला. तसेच वार्षिक वेतनवाढ ३ टक्क्यांऐवजी ६ टक्के करण्याची मागणी आहे. यामुळे कर्मचाऱ्यांच्या उत्पन्नात वाढ होऊ शकते.

HRA मध्येही मोठी वाढ करण्याची मागणी

सध्या शहरांच्या श्रेणीनुसार ३० , २० आणि १० टक्के HRA दिला जातो. हा दर अनुक्रमे ४०, ३५ आणि ३० टक्के करण्याचा प्रस्ताव आहे. यासोबतच रिटायरमेंटच्या वेळी मिळणाऱ्या रजा रोखीकरणाची मर्यादा ३०० दिवसांवरून ६०० दिवस करण्याची मागणी करण्यात आली.