गाझियाबाद : उत्तर प्रदेशातील गाझियाबादमध्ये रेल्वे ट्रॅकवर रील बनवणाऱ्या तीन जणांचा रेल्वेच्या धडकेत मृत्यू झाल्याची घटना समोर आली आहे. गाझियाबादमध्ये एक तरुणी आणि दोन तरुण रेल्वे रुळावर रील शूट करत असताना हा अपघात झाला. अचानक भरधाव वेगात आलेल्या ट्रेनने तिघांनाही धडक दिली. यात तिघांचा जागीच मृत्यू झाला.

मसुरी पोलीस स्टेशन हद्दीतील कल्लू गढी रेल्वे गेटजवळ रेल्वे रुळावर उभे राहून रील बनवत होते. घटनेची माहिती मिळताच पोलीस घटनास्थळी दाखल झाले. पोलिसांनी दिलेल्या माहितीनुसार, एक मुलगी आणि दोन तरुण कल्लू गढी रेल्वे ट्रॅकवर रील बनवत होते, तेव्हा तिघांना पद्मावत एक्सप्रेस ट्रेनने धडक दिल्याने त्यांचा मृत्यू झाला. (Latest Marathi News)

घटनेची माहिती प्रवाशांनी स्थानिक पोलिसांना दिली. माहितीच्या आधारे पोलीस घटनास्थळी पोहोचले आणि तपासात तिघेही रेल्वे रुळावर रील बनवत असल्याचे निष्पन्न झाले. (Railway Accident)

गाझियाबाद ग्रामीणचे डीसीपी यांनी सांगितलं की, रात्री 9 वाजण्याच्या सुमारास मसुरी येथे एका रेल्वे स्टेशन मास्टरला माहिती मिळाली की तेथे 3 लोकांना ट्रेनने धडक दिली आहे. आम्ही तिथे पोहोचलो तेव्हा आम्हाला 3 मृतदेह आढळले. मृतांमध्ये एक महिला आणि दोन पुरुषांचा समावेश आहे.

आम्हाला रेल्वेकडून माहिती मिळाली की हे तिघे तिथे व्हिडिओ बनवत होते. मात्र ट्रेन येत असल्याचा अंदाज या तिघांनाही आला नाही. त्यामुळे ट्रेनच्या धडकेनंतर त्यांचा जागीच मृत्यू झाला. मृतांची ओळख पटली असून, याप्रकरणी आवश्यक ती कारवाई केली जाईल, असं डीसीपींनी म्हटलं आहे.