शिंदखेडा : पावसाच्या लहरीपणामुळे शेतातून अपेक्षित उत्पन्न मिळत नाही. यामुळे शेतीसाठी घेतलेल्या कर्जाची परतफेड करणे शक्य होत नाही. या कर्जाच्या बोजाखाली दबलेला शेतकरी टोकाचे पाऊल उचलत असतो. अशाच दोन घटना शिंदखेडा तालुक्यात घडल्या असून कर्जफेडीच्या विवंचनेतून दोन शेतकऱ्यांनी आत्महत्या केल्या.  

शिंदखेडा (Shindkheda) तालुक्यातील देगाव येथील शेतकरी संजय आननसिंह गिरासे (वय ५०) यांनी शेतीसाठी कर्ज घेतले होते. मात्र दोन वर्षांपासून दुष्काळी परिस्थिती असल्याने राष्ट्रीयीकृत बँकेच्या (Bank) शेतीसाठी घेतलेल्या कर्जाची परतफेड करू शकले नाही. यातूनच संजय गिरासे यांनी शेतातील झाडाला दोरीने गळफास घेऊन आत्महत्या केली. त्यांचा पुतण्या प्रवीण पहाडसिंह गिरासे यांनी त्यांना गळफास घेतल्याच्या स्थितीत पहिले यानंतर घटना उघडकीस आली. 

तापी नदीत उडी घेत संपविले जीवन 
तर दुसऱ्या घटनेत सुकवद (ता. शिंदखेडा) येथील बारकू चिंधा पाटील (वय ५१) यांनी शेतीसाठी कर्ज घेतले असल्याने (Farmer) त्या कर्जाची परतफेड करता आली नाही. या विवंचनेत त्यांनी तापी नदीत उडी मारून आत्महत्या केली. बारकू पाटील यांनी पुलावर दुचाकी उभी करत तापी नदीपात्रात उडी मारली. नीलेश प्रकाश पाटील यांना याबाबत माहिती मिळाली. यानंतर स्थानिक लोकांच्या सहकार्याने बाहेर काढून शिंदखेडा ग्रामीण रुग्णालयात दाखल केले. वैद्यकीय अधिकारी डॉ. काटे यांनी मृत घोषित केले.