सांगली : हळद काढणीला सुरवात झाली असून काढणीनंतर शेतकरी विक्रीसाठी बाजार समितीमध्ये आणत आहे. दरम्यान सांगली कृषी उत्पन्न बाजार समितीमध्ये हळदीला अधिकच चांगला दर मिळू लागला आहे. या आठवड्यात पार पडलेल्या हळद सौद्यामध्ये तब्बल ३० हजार प्रतिक्विंटल इतका उच्चांक दर हळदीला मिळाला आहे. त्यामुळे हळदीला सोन्याची झळाळी मिळत आहे.

हळद काढणी झाल्यानंतर हळद उत्पादक शेतकरी विक्रीसाठी बाजार समितीमध्ये आणू लागला आहे. यात सांगलीच्या कृषी उत्पन्न बाजार समितीमध्ये मोठ्या प्रमाणात आवक वाढली आहे. व्यापाऱ्यांकडून सौदे पार पडले जात असून या आठवड्यात उच्चांकी दर शेतकऱ्यांना मिळाला आहे. यामुळे हळद उत्पादक शेतकऱ्यांमध्ये आनंदाचे वातावरण आहे.

सांगली कृषी उत्पन्न बाजार समितीचे वसंत दादा मार्केट यार्ड येथे सदाशिव मल्लाप्पा शिंनदोळी (रा. गुरलापूर, ता. मोडलगी, जि. बेळगाव) या शेतकऱ्याच्या हळदीला ३० हजार प्रति क्विंटल उच्चांकी दर मिळाला. ही खरेदी बंडा बाळा फराटे या आडत दुकानामार्फत यु के खिमजी अँड कंपनी या खरेदीदाराने केली. सांगली कृषी उत्पन्न बाजार समिती मध्ये शेतकऱ्यांनी जास्तीत जास्त हळद विक्रीसाठी आणावी असे आव्हान सांगली बाजार समितीचे सभापती सुजय शिंदे यांनी केली आहे.

अमरावती बाजार समितीत १७ हजार पोते धान्यांची आवक
अमरावती : अमरावती कृषी उत्पन्न बाजार समितीत १७ हजार पोत्याची विक्रमी आवक झाली. यामध्ये सर्वाधिक ७ हजार ७ पोते हरभरा, ५५९३ पोते तूर, ३ हजार ४८५ सोयाबीन आणि ९१२ पोती गव्हाची आवक झाली. सध्या हंगाम सुरू असल्याने आणि नाफेडमध्ये शेतमालाची खरेदी होत नसल्याने शेतकरी आर्थिक अडचणीत सापडला. मार्च अखेरीस शेतकऱ्यांना कृषी कर्ज भरायचे असल्याने बाजार समितीत दलालांमार्फत शेतकरी शेतमाल विकताना दिसतोय.