सागर निकवाडे 

नंदुरबार : उन्हाळी बाजरी काढणीच्या कामाला वेग आला आहे. बाजरी काढणी केल्यानंतर शेतकरी विक्रीसाठी कृषी उत्पन्न बाजार समितीमध्ये जात आहे. मात्र शेतकऱ्याच्या घरात बाजरी आल्यानंतर बाजरीच्या दरात मोठी घसरण झाल्याचे पाहण्यास मिळत आहे. यामुळे शेतकऱ्याला मोठे नुकसान सहन करावे लागत आहे. 

नंदुरबार (Nandurbar) जिल्ह्यात मोठ्या प्रमाणात उन्हाळी बाजरीचे उत्पन्न घेतला जात असते. सध्या उन्हाळी बाजरी कापणी तसेच मळणीचे काम सुरू आहे. मात्र नंदुरबार कृषी उत्पन्न बाजार समितीत बाजरीचे दर क्विंटल मागे ५०० ते ६०० रुपयांनी कमी झाले आहे. पावसाळ्याच्या तोंडावर खरीप हंगामसाठी शेतकऱ्यांना नाईलाजाने बाजरी कमी भावात विक्री करावी लागत आहे. आवक कमी असूनही दर कमी झाल्याने शेतकरी (Farmer) चांगलेच आर्थिक संकटात सापडले आहे. 

उत्पादनातही घट  

पंधरा दिवसांपूर्वी बाजरीचे दर २६०० ते २७०० रुपये प्रती क्विंटल होता. मात्र, गेल्या पाच ते सात दिवसांपासून बाजरीला २१०० ते २२०० रुपये प्रतिक्विंटल दर मिळत आहे. एकरी १८ ते २२ क्विंटल येणारी बाजरी (Bajar Samiti) यावर्षी पाण्याच्या कमतरतेमुळे केवळ १० ते १२ क्विंटल आली आहे. यात क्विंटल मागे ५०० ते ६०० रुपये दर कमी झाले असून केवळ २१००  ते २२०० रुपये प्रतिक्विंटल दराने बाजरी विकली जात आहे. या दरात एकरी लावलेले भांडवलही निघत नसून शेतकऱ्यांना नाईलाजाने कमी भावात बाजरी विक्री करावी लागत आहे.