संजय सूर्यवंशी 

नांदेड : सरकारने शेतकऱ्यांसाठी १ रुपयामध्ये शेती पीक विमा योजना सुरु केली आहे. केंद्र व राज्य सरकार मोठ्या प्रमाणात यासाठी आर्थिक तरतूद करत असते. मात्र यंदा शेतकऱ्यांकडून हवा तसा प्रतिसाद मिळत नसल्याचे पाहण्यास मिळत आहे. योजनेचा लाभ घेण्यासाठी शेवटचे तीन दिवस शिल्लक असताना नांदेड जिल्ह्यातील केवळ ७ लाख ४५ हजार शेतकऱ्यांनीच पीक विमा उतरविला आहे. 

खरीप हंगाम सुरु झाल्यानंतर पीक विमा योजना सुरु करून त्यासाठी १५ जुलैपर्यंत मुदत देण्यात आली होती. परंतु अजूनही अनेक (Farmer) शेतकरी विमा काढण्यापासून दूर राहिले आहेत. योजनेची प्रभावी अंमलबजावणी लक्षात घेता, प्रत्येक गावागावात यासंदर्भात जनजागृती व्हावी. केवळ १ रुपयामध्ये सेवाकेंद्र, सेतूकेंद्र व बँकेत जाऊन प्रधानमंत्री पिक विमा (Crop Insurance) योजनेचा लाभ घेता येतो. पीक विमा योजनेसाठी १५ जुलै शेवटची तारीख आहे. यामुळे सर्व शेतकऱ्यांनी याबाबत तातडीने पीक विमा योजनेचा लाभ घ्यावा असे आवाहन जिल्हा कृषी अधीक्षक भाऊसाहेब बह्राटे यांनी केले आहे. त्यामुळे नांदेड जिल्ह्यातील ज्या शेतकऱ्यांनी आपले पीक संरक्षित केले नाही; आशा शेतकऱ्यांनी तातडीने पीक विमा योजनेचा लाभ घ्यावा, असे आवाहन केले आहे. 

गतवर्षीच्या तुलनेत संख्या घटली 

गेल्या वर्षीच्या तुलनेत कमी शेतकऱ्यांनी पीक विमा योजनेचा लाभ यावर्षी घेतला आहे. यावर्षी ९७ टक्के पाऊस आतापर्यंत (nanded) आला असून पिके संरक्षित करणे आवश्यक आहे. गेल्यावर्षी पीक विमा योजनेमध्ये ११ लाख शेतकऱ्यांनी भाग घेतला होता. मात्र यावर्षी ११ जुलैपर्यंत ७ लाख ४५ हजार शेतकऱ्यांनीच पीक विमा योजनेचा लाभ घेतला आहे. या योजनेतून नांदेड जिल्ह्यामध्ये ४०० कोटीपेक्षा अधिक लाभ शेतकऱ्यांना झाला आहे.