रणजित माजगावकर 
कोल्हापूर : कोल्हापूर जिल्ह्यात गेली १५ दिवस मुसळधार पाऊस झाला. पंचगंगा नदीने धोक्याची पातळी ओलांडली होती. यानंतर जिल्ह्यातील अनेक भागात पाणी शिरायला सुरुवात झाली होती. मात्र गेली ४ दिवस पावसाने उसंत दिल्यानंतर पुराचे पाणी आता हळूहळू ओसरत आहे. यानंतर नुकसानग्रस्त भागांचे पंचनामे सुरु करण्यात आले आहे.

कोल्हापूर (Kolhapur) जिल्ह्यात मागील पंधरा दिवसांपासून मुसळधार पाऊस झाला आहे. यामुळे जिल्ह्यातील अनेक भागात पूरजन्य परिस्थिती निर्माण झाली आहे. या पुरामुळे घरांची देखील पडझड झाली असून शेतातील पिकांचे मोठ्या प्रमाणात नुकसान झाले आहे. जिल्ह्यातील अनेक गावांना पुराचा फटका बसला. नदी काठी असलेली पिक गेली अनेक दिवस पाण्यापमध्ये राहिल्याने शेती पिकांचे मोठे नुकसान झाले आहे. याशिवाय (Heavy Rain) मुसळधार पाऊस आणि पुराच्या पाण्यामुळे अनेक घरांची पडझड झाली आहे. या सर्व पार्श्वभूमीवर जिल्हाधिकारी अमोल येडगे यांनी तातडीने पंचनामे करण्याचे आदेश दिले आहेत. 

त्यानूसार आता पंचनामे करण्यास सुरवात झाली आहे. महसूल विभागाचे अधिकारी, कर्मचारी त्याचबरोबर कृषी विभागाचे अधिकारी, कर्मचाऱ्यांच्या वतीने हे पंचनामे करण्यात येत आहेत. तर शहरी भागामध्ये महापालिकेचे कर्मचारी पंचनामे करत आहेत. लवकरच पंचनामे पूर्ण करून नुकसान भरपाई करिता त्याचा अहवाल शासनाकडे पाठवण्यात येणार आहे; अशी माहिती कोल्हापूरचे जिल्हाधिकारी येडगे यांनी दिली.