अक्षय शिंदे 
जालना : मोसंबीच्या आगार म्हणून ओळखल्या जाणाऱ्या जालना येथील कृषी उत्पन्न बाजार समितीमध्ये मागील काही दिवसापासून मोसंबीच्या भावात चढ- उतार सुरू आहे. सद्यस्थितीला शेतकऱ्यांच्या मोसंबीला कमीत कमी १३ हजार रुपये तर २३ हजार रुपये टन असा दर मिळत आहे. यामुळे मोसंबी उत्पादक शेतकऱ्यांमध्ये सध्या आनंदाचे वातावरण आहे. 

जालना जिल्ह्यात मोसंबीचे मोठ्या प्रमाणात उत्पादन घेतले जात असते. त्याठिकाणची मोसंबी परराज्यात पाठविण्यात येत असते. सद्यस्थितीला मोसंबीच्या मागणीत वाढ झाल्याने दरात देखील मोठ्या प्रमाणात वाढ होत आहे. परिणामी उत्पादक शेतकऱ्यांना चांगला आर्थिक फायदा होत आहे. तसेच मागणी वाढत असल्याने दरात देखील आणखी वाढ होण्याची शक्यता वर्तविली जात आहे. 

रोज १२० टन मोसंबीची आवक 

जालना जिल्ह्यातून मोठ्या प्रमाणात मोसंबीचे उत्पादन निघत आहे. यामुळे जालना बाजार समितीत दररोज १०० ते १२० टन मोसंबीची आवक होत आहे. जालन्याची मोसंबी जयपूर, कोलकत्ता, दिल्ली या ठिकाणी पाठवली जात आहे. यामुळे शेतकऱ्यांना देखील चांगला भाव सद्यस्थितीला मिळत आहे. जालना बाजार समितीत जास्तीत जास्त भाव २३ हजार रुपये टन इतका मिळत आहे. 

आंध्र प्रदेशच्या मोसंबीची आवक वाढली 

उत्तर भारतातील मार्केटमध्ये आंध्र प्रदेशातील मोसंबीची आवक वाढ झाल्याने जिल्ह्यातून होणाऱ्या मोसंबीचे भाव आगामी काळात वाढण्याची शक्यता कमी आहे.आंध्र प्रदेशातून येणाऱ्या मोसंबीचे भाव हे जालन्यातील मोसंबी पेक्षा कमी असल्याने त्याचा परिणाम स्थानिक मोसंबीच्या भावावर पडत असल्यानं जालना जिल्ह्यातील मोसंबी उत्पादक शेतकरी पुन्हा एकदा अडचणीत सापडण्याची शक्यता आहे.