पारोळा (जळगाव) : तामसवाडी मंडळातील ढोली बोळे, वेल्हाणे, तामसवाडी व कराडी परिसरात रविवारी (4 सप्‍टेंबर) सायंकाळी सहा ते सात वाजेच्या दरम्यान झालेल्या वादळी पावसामुळे (Heavy Rain) कापूस पिकासह इतर पिकांना फटका बसल्याने शेतकऱ्यांचे (Farmer) मोठ्या प्रमाणात नुकसान झाले आहे. (Jalgaon News Heavy Rain)

गेल्या काही दिवसांपासून उघडीप मिळालेल्या पावसाने (Rain) तालुक्यातील अनेक ठिकाणी जोरदार आगमन झाले. मात्र तामसवाडी मंडळात वादळी पावसामुळे रस्त्यावरील झाडे कोलमडली. याबरोबर शेतातील (Cotton) कपाशी पिकांसह इतर पिके पावसामुळे जमिनीवर आडवी पडल्याने शेतकऱ्यांचे मोठ्या प्रमाणात नुकसान झाले आहे. सायंकाळच्या पावसामुळे शेतकऱ्यांसह मजूर वर्ग यांची एकदम धावपळ उडाली.

पंचनाम्‍याची मागणी

ढोली येथील शेतकरी संजय राजाराम पाटील, किरण गुमान पाटील, दीपक संतोष पाटील, मदन रामदास पाटील, पांडुरंग छबुलाल पाटील, लोटन वामन पाटील यांच्या पिकांचे नुकसान झाले असून कृषी विभाग व महसूल विभागाने परिसराची पाहणी करून पंचनामे करावे अशी मागणी येथील शेतकऱ्यांनी केली आहे.