अमळनेर (जळगाव) : येथील मंगळग्रह सेवा संस्थेतर्फे मंगळग्रह पिक विमा जनजागृती रथ तालुक्यातील ग्रामीण भागात पिक विमाबाबत जनजागृती करण्यासाठी मंदिरातून रवाना झाला आहे. दहा दिवसांत तालुक्यातील १५४ गावांमध्ये हा रथ पीक विमा (Crop Insurance) बाबत जनजागृती करणार आहे. (Jalgaon News Crop Insurance)

अमळनेर (Amalner) येथील प्रसिद्धी मंगळग्रह मंदिर संस्‍थानतर्फे हा उपक्रम राबविला जात आहे. संस्थेचे अध्यक्ष डिगंबर महाले व तालुक्यातील हिंगोणे बु. येथील प्रगतीशील शेतकरी (Farmer) अजयसिंग पाटील यांनी रथाचे विधिवत पूजन केले. संस्थेचे खजिनदार गिरीश कुलकर्णी व कृषी विभागाचे दीपक चौधरी यांनी श्री मंगळदेव ग्रह मंदिराचा भगवा ध्वज दाखवून रथाला चालना दिली. रथाची काही अंतरापर्यंत सवाद्य मिरवणूक (Jalgaon News) काढण्यात आली. संस्थेतर्फे दरवर्षी शेतकऱ्यांच्या कल्याणार्थ तथा मार्गदर्शनार्थ अनेकवीध कार्यक्रम राबविले जातात. हा उपक्रम त्याचाच एक भाग आहे.

शेतकऱ्यांमध्‍ये जनजागर

पीक विमाविषयी अजूनही शेतकऱ्यांमध्ये फारसा जनजागर नाही. पीक विम्याच्या फायद्यांबाबत त्यांना फारशी माहिती नाही. शेतकऱ्यांना ही माहिती व्हावी; दुर्दैवाने शेतकऱ्यांना नैसर्गिक आपत्तीमुळे नुकसान झाल्यास त्यांना त्याची भरपाई मिळावी, यासाठी जनसेवार्थ हा रथ रवाना झाला आहे. रेकॉर्डेड माहिती, बॅनर व पॉम्प्लेटच्या माध्यमातून जनजागृती करण्यात येणार आहे.