धुळे : धुळे जिल्ह्यात अद्यापही समाधानकारक पाऊस झालेला नाही. यामुळे शेतातून चांगले उत्पादन येण्याबाबत शक्यता कमी आहे. याच दरम्यान आता कपाशी पीक फुलावर आले असून यावर गुलाबो अळीने आक्रमण केले आहे. तसेच कपाशीची कैरी पक्की झाल्यानंतर त्यावर बोन्डअळी पडण्याची शक्यता असल्याने शेतकरी चिंतेत सापडला आहे.  

धुळे (Dhule) जिल्ह्यात यंदा सुरवातीपासूनच चांगला पाऊस झालेला नाही. अशा परिस्थितीमध्ये शेतकऱ्यांनी रिमझिम पडणाऱ्या पावसाच्या जोरावर कपाशीची लागवड करत पीक घेतले. शेतकऱ्याने जेमतेम जगवलेल्या या कपाशी पिकावर (Cotton Crop) गुलाबी बोंड आळीने आक्रमण केले आहे. सध्या फुलअवस्थेत असलेल्या कपाशी पिकावर बोंड आळीने आक्रमण केल्यामुळे शेतकऱ्यांच्या चिंतेत वाढ झाली आहे. अळी नियंत्रणात आणण्यासाठी शेतकरी आता फवारणी करू लागला आहे. 

गेल्या काही वर्षापासून बोंड अळीच्या सततच्या आक्रमणामुळे बऱ्याचशे (Farmer) शेतकरी इतर पिक लागवडकडे वळला आहे. तरी अजूनही अनेक शेतकरी कपाशी या पिकाची लागवड बऱ्यापैकी करीत असून, आता या कपाशीवर फुलावस्थेतच गुलाबी अळी दिसून आल्याने बोंड अळीचा प्रादुर्भाव वाढणार हे जवळपास निश्चित झाले आहे. त्यामुळे आगामी काळामध्ये कापूस उत्पादक शेतकऱ्यांना बोंड अळीच्या प्रादुर्भावाला देखील मोठ्या प्रमाणात सामोरे जावे लागणार असल्याची भीती शेतकऱ्यांना वाटू लागली आहे.