बालाजी सुरवसे 
धाराशिव : पारंपरिक शेती न करता वेगवेगळे प्रयोग करून अनेक शेतकरी शेतीतून चांगले उत्पन्न घेत असतात. अशाच प्रकारे धाराशिव सारख्या दुष्काळी भागात बेंबळी गावातील शेतकरी वाघे बंधू यांनी शेतीमध्ये खजुर शेतीचा प्रयोग यशस्वी केला आहे. या शेतीतून या शेतकऱ्यांना जवळपास ३ लाख रुपयांपर्यंत उत्पन्न मिळण्याची अपेक्षा आहे. 

धाराशिव (Dharashiv News) जिल्ह्यातील बेंबळी या छोट्याशा गावातील महेश वाघे व अनुप वाघे बंधूनी यशस्वी प्रयोग केला आहे. त्यांना कृषी प्रदर्शनातून खजूर शेतीची माहिती मिळाली. याची सविस्तर माहिती घेऊन शेती नेमकी कशी करायची, खजुराच्या झाडाची निगा कशी राखायची याबाबत माहिती करून घेतली. त्यानंतर त्यांनी एक एकरावर खजूर शेतीची लागवड करण्यासाठी सौदी अरेबिया येथून ६ लाख रुपयांची खजुराची झाडे (Farmer) आणली. एक एकराच्या क्षेत्रात एकूण ६४ झाडे लावली असून त्यांची योग्य पद्धतीने निगा राखण्याचे काम केले. 

खजुराची शेती लागवड करून तीन वर्षानंतर त्याला पिक धारणा होते. वाघे बंधूनी कोणतेही रासायनिक खत न वापरता सेंद्रिय खतांचा वापर केला आहे. यावर्षी त्यांना खजूर शेतीसाठी ४० हजार रुपये खर्च झाला आहे. बाजारात सध्या २०० रुपये किलो दराने खजूर विक्री स्वतः वाघे बंधू करत आहेत. या खजूर शेतीतून २ टन खजूर उत्पन्न अपेक्षित असल्याचे त्यांनी सांगितले. अपेक्षित उत्पन्न मिळाले तर साधारण ३ लाख रुपयापर्यंत खजूर विक्री होऊ शकते.