Pandharpur News :

पंढरपूरच्या बाजारात हरभऱ्याची भाजी चिकनच्या दरात विकली जात आहे. सध्या ५० ते ६० रुपये पाव किलो म्हणजे २०० ते २४० रुपये किलो दराने हरभऱ्याची (harbhara) विक्री होत आहे. बाजारात ब्रॉयलर चिकनचा (broiler chicken) दर २०० रुपये किलो आहे. एकंदरीतच दराची तुलना केली असता हरभऱ्याची भाजी मात्र चिकन पेक्षा ही भाव खाऊ लागली आहे. (Maharashtra News)

हिवाळ्यातील हंगामात बहुतांश शेतकरी हरभऱ्याची लागवड करतात. कडाक्याची थंडीमुळे पहाटे हरभऱ्याच्या पानांवर आंब पडली की मग भाजीसाठी हरभर्‍याचे कोवळे शेंडे खुडले जातात.

ही खुडलेली हरभऱ्याची भाजी ग्रामीण भागातील काही शेतकरी बाजारामध्ये विक्रीला घेऊन येत आहेत. फक्त थंडीच्या दिवसांत मिळणाऱ्या व भरपूर जीवनसत्व आणि पोषणमूल्य असलेल्या या भाजीला ग्राहकांकडून मोठी मागणी असते.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या भाजीची आवक कमी व मागणी जास्त असल्यामुळे या भाजीला इतर भाज्यांपेक्षा सर्वाधिक भाव मिळतो. एकंदरीतच दराची तुलना केली असता चिकन पेक्षाही हरभऱ्याची भाजी जास्त भाव खात असल्याचे चित्र पंढरपूरच्या बाजारात दिसून येत आहे.

Edited By : Siddharth Latkar