लातूर - जिल्ह्यात शेतकऱ्यांच्या फसवणुकीचे प्रकार वारंवार होत असून नुकतेच लातूर मध्ये शेतकऱ्यांची तब्बल 85 लाख 15 हजार 345 रुपयांची फसवणूक केल्याचा प्रकार उघडकीस आला आहे. गोल्डस्टार ग्रो इंडिया लिमिटेड कंपनीच्या माध्यमातून लातूर (Latur) जिल्ह्यातील शेतकऱ्यांच्या (Farmer) सोयाबीनची खरेदी करण्यात आली. बाजार भावापेक्षा अधिक भाव देण्याचे अमिष दाखवण्यात आले.

तब्बल 85 लाख 15 हजार 345 रुपयांची फसवणूक करण्यात आल्याप्रकरणी एका महिलेसह तिघांविरुध्द एमआयडीसी पोलीस ठाण्यात फसवणूकीचा गुन्हा दाखल करण्यात आला आहे. या प्रकरणी पोलीस पुढील तपास करीत आहे.

हे देखील पाहा -

या प्रकरणी लातूर येथील एमआयडीसी पोलीस ठाण्यात जगदीश सोमवंशी यांनी दिलेल्या तक्रारीनुसार सोयाबीनला प्रतिक्विंटल 8000 रुपये भाव देण्याचे आरोपींनी सांगितले. आयसीआयसीआय बँकचे धनादेश देखील २ शेतकऱ्यांना देण्यात आले. त्यांचे एमआयडीसीमधील गोदाम बंद होते. अनेक शेतकऱ्यांचे पैसे त्यांनी दिलेच नाहीत, अशी माहिती मिळाली. हे तिघेही आरोपी फरार झाले होते.

या तिन्ही आरोपींनी जगदीश सोमवंशी यांच्यासह अनेक शेतकऱ्यांचे सोयाबीन आणि तूर खरेदी करून तब्बल 85 लाख 15 हजार 345 रुपयांची फसवणूक केली होती. या फसवणूक प्रकरणी पोलिसांनी अतिक युसुफ शेख, कल्पना सांगवीकर, यशवंत नाडे यांच्याविरुध्द गुन्हा दाखल केला आहे.