नाशकात कोथिंबिरीला सोन्याचा भाव; लिलावात एका जुडीला तब्बल 190 रुपये!

नाशिक - कोणतीही भाजी असो की बिर्यानी असो किंवा चैपाटीवर मिळणारी भेळ असो, या सर्व पदार्थांची चव वाढते ती कोथिंबिरीमुळे. सकाळच्या नाष्ट्यापासून ते रात्रीच्या जेवणापर्यंत कोथिंबिरीचा वापर हा होतचं असतो. आज हीच कोथिंबिर पुन्हा एकदा चर्चेत आली आहे. ती तिच्या वाढलेल्या किंमतीमुळे. सध्या नाशिकच्या (Nashik) बाजारात कोथिंबीरीला सोन्याचा भाव आला आहे.

नाशिक बाजारसमितीत कोथिंबिरीचे भाव कमालीचे कडाडले आहेत. लिलावामध्ये कोथिंबिरीला शेकडा १९ हजार रुपये भाव मिळाला आहे. म्हणजेच कोथिंबिरीची प्रत्येकी एका जुडीला तब्बल १९० रुपये इतका विक्रमी भाव मिळाला आहे. गेल्या काही दिवसांपासून सुरु असलेल्या पावसामुळे शेतातला माल मोठ्या प्रमाणात खराब झाला आहे. त्यामुळे बाजारात कोथिंबिरीची आवक मोठ्या प्रमाणात घटल्याने त्याचा परिणाम कोथिंबिरीच्या भावावर झाला आहे. सध्या बाजारात कोथिंबिरीला सोन्याचा भाव आला आहे.

गेल्या काही दिवसांपासून नाशकात सातत्त्याने पाऊस बरसतोय. अनेक ठिकाणी शेतात पाणी साचत असल्यानं अन्य भाज्यांप्रमाणे कोथिंबीर पिकांचंही मोठं नुकसान झालं आहे. उत्पादन घटल्याने मागील २ आठवड्यापासून कोथिंबिरीचे भाव वाढायला सुरुवात झाली आहे. मागील आठवड्यात १० ते १२ हजार रुपये शेकडा, त्यानंतर २ दिवसांपूर्वी १६ हजारांवर पोहचलेल्या भावानं आता १९ हजारांचा उच्चांकी दर गाठला आहे. येत्या काळात कोथिंबिरीचे भाव आणखी वाढण्याची शक्यता असल्याने कोथिंबीरीचा जपून वापर करा.

Edited By - Shivani Tichkule