अन्यथा ऊसतोड बंद करणार; शेतकरी संघर्ष समितीचा इशारा

नंदुरबार : ऊस उत्पादक शेतकऱ्यांच्या वाढलेला खर्च तसेच बाजारात साखरेचे दर मागील वर्षापेक्षा जास्त आहेत. तरीदेखील चालू हंगामात मागील वर्षापेक्षा कमी ऊस दर देऊन कारखाने शेतकऱ्यांची फसवणूक करीत आहे. विशेष म्हणजे शेतकऱ्यांची दिशाभूल व लुट करून साखर कारखानदार ऊस वाहतुकीचा खर्च व मजुरी देखील शेतकऱ्यांकडून वसूल करत असल्याचे चित्र आहे. यामुळ चालू गळीत हंगामात साखर कारखान्यांनी २ हजार ७०० रुपये ऊस दर वाढवून द्यावा; अन्यथा ऊसतोड बंद करण्याचा इशारा शेतकरी संघर्ष समितीने दिला आहे. (nandurbar-news-Otherwise-the-cane-will-close-Warning-of-Farmers-Committee)

नंदुरबार (Nandurbar) जिल्ह्यातील सहकारी व खाजगी साखर कारखान्यांनी यंदा ऊस उत्पादक शेतकऱ्यांना (farmer) अत्यंत कमी ऊसदर दिला आहे. केंद्र शासनाच्या धोरणानुसार उसाच्या रिकवरीनुसार कारखान्यांनी दर देणे अपेक्षित असतानाही कारखान्यांकडून ऊस (Sugarcane) उत्पादक शेतकऱ्यांची फसवणूक केली जात आहे. नंदुरबार जिल्ह्यात साधारणता उसाची रिकव्हरी १०.४८ टक्के असून साखर कारखान्यांनी २९०० रुपये प्रति टन भाव देणे अपेक्षित असतानाही शहादा येथील सातपुडा तापी सहकारी साखर कारखान्याने २३०१ रुपये प्रति टन दर दिला आहे, तर नंदुरबार समशेरपुर येथील आयान शुगर कारखान्याने २३५० रुपये प्रति टन ऊस दर जाहीर केला आहे. तर नवापूर (Navapur) आदिवासी साखर कारखान्याने २५२५ रुपये प्रति टन दर दिला आहे.

खर्चाचा बोजा शेतकऱ्यांवर नको

ऊस तोड व वाहतुकीचा वाढीव खर्चाचा बोजा शेतकऱ्यांवर न टाकता कारखानदारांनी ऊस उत्पादक शेतकऱ्यांना २ हजार ७०० रुपये प्रति टन ऊस भाव देण्याची मागणी शेतकरी संघर्ष समिती व ऊस उत्पादक शेतकऱ्यांनी केली आहे. तसेच शासन व लोकप्रतिनिधींनी रिकवरीच्या बाबतीत पारदर्शकता आणण्यासाठी समिती स्थापन करून शेतकऱ्यांना न्याय द्यावा. सदर मागण्यांचे निवेदन जिल्हाधिकारी यांच्यामार्फत साखर आयुक्त महाराष्ट्र राज्य पुणे (Pune) यांना शेतकरी संघर्ष समिती व ऊस उत्पादक शेतकर्‍यांच्या वतीने देण्यात आले आहे. पुढील आठ दिवसात ऊस उत्पादक शेतकऱ्यांच्या मागण्या मान्य न झाल्यास चालू हंगामातील सुरू असलेली ऊस तोड बंद करून आंदोलनाचा इशारा ऊस उत्पादक शेतकऱ्यांनी दिला आहे.