Punjab Cow Drag Old Man: वृद्ध व्यक्तीला गायीनं १०० मीटरपर्यंत नेलं फरफटत; ८३ वर्षीय व्यक्तीचा मृत्यू, VIDEO VIRAL

Cow Draged Elderly man:

पंजाबमधील मोहालीमध्ये मोकाट गायीमुळे एका वृद्धाचा मृत्यू झाल्याची धक्कादायक घटना घडलीय. स्वरूप सिंग, असे या मृत वृद्धाचे नाव आहे. गायीनं ८३ वर्षीय स्वरूप सिंग यांना १०० मीटरपर्यंत फरफटत नेल्याचे दृश्य सीसीटीव्हीमध्ये कैद झालेत. हा व्हिडिओ 'एक्स' (आधीचे ट्विटर) या सोशल मीडियाच्या प्लॅटफॉर्मवर वीणा मेहत्रा यांनी शेअर केलाय. (latest Viral News)

स्वरूप सिंग यांच्या घरात ही मोकाट गाय शिरली होती. स्वरूप सिंग त्या गायीच्या गळ्यातील दोर पकडून तिला पकडण्याचा प्रयत्न करत होते. त्यावेळी ही गाय बिधरली आणि पळू लागली. त्यावेळी सिंग यांचा तोल गेला आणि ते खाली पडले. गायीच्या गळ्यातील दोर त्यांच्या हातात असल्यानं गायीने त्यांना १०० मीटरपर्यंत फरफटत नेलं. सिंग यांना ज्या रस्त्यावरुन गायीनं फरफटत नेलं, त्या रस्त्यावरुन वाहनं धावत होती. त्यामुळे ती गायी अधिकच बिधरली.

रस्त्याने जाणाऱ्या लोकांना गाय स्वरूप सिंग यांना फरफटत नेत असल्याचं समजलं, तेव्हा त्यांनी त्या गायीला थांबवण्याचा प्रयत्न केला. परंतु गाय अधिक वेगाने पळू लागली. यात स्वरूप सिंग यांचा मृत्यू झाला. हा सोशल मीडियावर व्हायरल होतोय.

मोकाट जनावरे पायी चालणाऱ्या लोकांवर हल्ला करत असल्याच्या अनेक ठिकाणी वाढत आहेत. काही दिवसांपूर्वी चेन्नई येथे शाळेतून घरी जाणाऱ्या एका मुलीवर गायीनं हल्ला केला होता. त्यात शाळकरी मुलगी गंभीर जखमी झाली होती. हा व्हिडिओही सोशल मीडियावर खूप व्हायरल झाला होता.