Nashik News : दुतोंड्या मारूतीच्या गुडघ्याला लागले पाणी; जाणून घ्या नाशिकची पूरस्थिती

गंगापूर धरणातून सुरू असलेल्या पाण्याच्या विसर्गामुळे नाशिकच्या गोदावरी नदीतील पाणी पातळी वाढत आहे. गोदा घाट परिसरातील सर्व मंदिरांना पाण्याने वेढा घातला आहे. त्यामुळे नाशिकमध्ये गोदावरी नदीत पुन्हा एकदा पूर सदृश्य परिस्थिती निर्माण झाली आहे.

गंगापूर धरणातून २२०० क्युसेक वेगाने गोदावरी नदीत पाण्याचा विसर्ग सुरू करण्यात आला असल्याने गोदावरीच्या पाणी पातळीत झपाट्याने वाढ होत आहे. यामुळे राम कुंड, गोदावरी घाटाचा परिसरात पाण्याचे प्रमाण वाढले असून गोदा घाटावर असलेल्या सगळ्या मंदिरांना पाण्याचा वेढा पडलेला बघायला मिळत आहे. तर दुतोंड्या मारूतीच्या गुडघ्यापर्यंत पाणी पोहोचले आहे. सततच्या पावसाने शहरासह उपनगरीय भागातून पावसाचे पाणी देखील नदीत जाऊन मिसळत असल्याने ही पाणी पातळी अजून काही प्रमाणात वाढू शकते. या परिसरातील नागरिकांना सतर्क राहण्याचा इशारा प्रशासनाकडून देण्यात आला आहे.