VIDEO : धक्कादायक ! प्रेमविवाह केला म्हणून 7 पिढ्या समाजातून केल्या बहिष्कृत !

बीडमधल्या आष्टी तालुक्यातील डोईठाणमध्ये एका व्यक्तीने समाजाची परवानगी न घेता प्रेम विवाह केला म्हणून त्याला अडीच लाख रुपयांचा दंड ठोठावण्यात आला आहे. हा दंड भरण्यास असमर्थता दर्शवल्याने या इसमच्या सून आणि मुलासह पुढच्या 7 पिढ्या समाजातून बहिष्कृत करण्याचा निर्णय जात पंचायतीने दिला आहे.

सासऱ्याने जुन्या काळात जातीतील मुलीशी प्रेमविवाह केल्याने जातपंचायतीने सासऱ्याला अडीच लाखांचा दंड ठोठावला व जातीतून बहिष्कृत केले. हा थकीत दंड आता त्यांचा मुलगा व सुनेने भरावा, असे फर्मान जातपंचायतीने काढले. मात्र, दंड भरण्यास मुलगा व सुनेने असमर्थता दर्शवल्यानंतर त्यांना व त्यांच्या पुढच्या सात पिढ्यांना, जातीतून बहिष्कृत करण्याचा निर्णय जातपंचायतीने दिल्याचा धक्कादायक प्रकार डोईठाण (ता. आष्टी) येथे घडला. याप्रकरणी ८ जणांविरोधात आष्टी पोलिसांत गुन्हा दाखल झाला. दरम्यान, तक्रारदाराच्या सासऱ्यांनी कधी प्रेमविवाह केला होता त्याची कोणतीही माहिती तक्रारदारांनी दिलेली नाही, अशी माहिती तपास अधिकारी शिंदे यांनी दिली आहे.