महाराष्ट्रात प्रसिद्ध असलेल्या श्री काळभैरवनाथाच्या यात्रेतील परंपरागत आणि वैशिष्ट्यपूर्ण बगाडाची मिरवणूक आज निघाली. यावर्षी बगाड्या होण्याचा मान बावधन येथील अजित बळवंत ननावरे (वय ३९ वर्षे) यांना मिळाला आहे. वाईजवळच्या बावधन येथे दरवर्षी फाल्गुन महिन्यात ३ दिवस ग्रामदैवत श्री काळभैरवनाथाची यात्रा भरते.
काळभैरवनाथाच्या यात्रेत भैरवनाथाचा विवाह सोहळा, छबिना, बगाड मिरवणूक असे कार्यक्रम होतात. यावर्षी देवाला केलेल्या नवसाची परतफेड करण्यासाठी बगाड घेण्याची प्रथा आहे. होळी पौर्णिमेच्या दिवशीच्या रात्री १२ वाजल्यानंतर बगाड्या ठरविण्यासाठी मंदिरातील पुजारी देवास पारंपरिक पद्धतीने कौल लावत असतात. यावर्षी एकूण ४४ नवसकरी नवस फेडण्यासाठी बसले होते. यामधील १० व्या क्रमांकावर असलेल्या अजित बळवंत ननावरे यांच्या बाजूने देवाने प्रसाद दिला असून त्यांना यंदाचा बगड्या होण्याचा मान मिळाला आहे.
अजित बळवंत ननावरे यांनी त्यांचे बंधू सुनील बळवंत ननावरे यांच्या लग्न जुळवण्यासाठी येणाऱ्या अडचणी दूर होऊन त्यांचे लग्न लवकर व्हावे, यासाठी २०१४ मध्ये नाथांच्या चरणी नवस केला होता आणि तो पूर्ण झाला. अजित ननावरे हे पहिल्यांदाच नाथांचा प्रसाद घेण्यासाठी बसले होते आणि याचवर्षी बगाड्या होण्याचा मान त्यांना मिळाला. त्यानंतर काशिनाथाचं चांगभल, असा गजर करत बगाड्याच्या नावाची घोषणा केली.
बगाड म्हणजे दगडी चाके असलेला गाडा असतो. त्यावर बांबूच्या सहाय्याने ३० फूट उंचीचे शीड उभारलेले असते. हे शीड गोलाकार फिरते. त्यावर झोपाळ्याच्या मदतीने बगाड्यास टांगले जाते. त्यानंतर बगाड रथ चार- पाच बैलजोडीच्या सहाय्याने ओढला जातो. अधून- मधून बैल जोड्या बदलण्यात येतात. बावधनमधील हे बगाड पाहण्यासाठी राज्यभरातून भाविक मोठ्यासंख्येने येतात.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.