PSL 2023: शाहीन आफ्रिदीचा कहर..पहिल्या चेंडूवर तोडली बॅट तर दुसऱ्याच चेंडूवर तोडला स्टंप: VIDEO

Shaheen Afridi PSL 2023: पाकिस्तान संघाचा स्टार गोलंदाज शाहीन आफ्रिदी सध्या जोरदार कामगिरी करतोय. त्याने पाकिस्तान सुपर लीग स्पर्धेत पेशावर जाल्मी संघाविरुध्द झालेल्या सामन्यात सुरवातीच्या षटकात अप्रतिम गोलंदाजी करताना दिसून आला आहे. त्याच्या गोलंदाजीचा व्हिडीओ सध्या सोशल मीडियावर व्हायरल होत आहे. (Latest Sports Updates)

या स्पर्धेत लाहोर कलंदर्स संघाचे नेतृत्व करत असलेला शाहीन आफ्रिदी वाऱ्याच्या वेगाने गोलंदाजी करताना दिसून येत आहे. या षटकातील पहिल्याच चेंडूंवर त्याने मोहम्मद हॅरिसची बॅट तोडली. तर दुसऱ्याच चेंडूंवर त्याने हॅरिसच्या यष्ट्या उधळल्या.

तो इथेच थांबला नाही तर त्याने पुढे पेशावर जाल्मी संघाचा कर्णधार बाबर आजमला देखील त्रिफळाचित करत माघारी धाडले.

दोन महिने क्रिकेपासून दूर राहिलेल्या शाहीन आफ्रिदीने पाकिस्तान संघासाठी आणि पाकिस्तान सुपर लीग स्पर्धेत पुनरागमन केले आहे. काही दिवसांपूर्वी तो दुखापतीमुळे संघाबाहेर झाला होता. मात्र त्याने या स्पर्धेतून जोरदार पुनरागमन केले आहे. या स्पर्धेतील ४ सामन्यांमध्ये त्याने आतापर्यंत १० गडी बाद केले आहेत.

शाहीनने या सामन्यात ४० धावा खर्च करत ५ गडी बाद केले. लाहोर संघाने या सामन्यात प्रथम फलंदाजी करताना २० षटकअखेर ३ गडी बाद २४० धावा केल्या होत्या. तर धावांचा पाठलाग करण्यासाठी आलेल्या पेशावर संघाला २०१ धावा करता आल्या.