Uttar Pradesh Train Incident: बरेलीत धावत्या ट्रेनसमोर फेकलं तरुणीला, खुद्द मुख्यमंत्र्यांनी घेतली दखल

Uttar Pradesh Train Incident

छेडछाडीला विरोध केल्यामुळे दोन तरुणांनी एका १७ वर्षांच्या मुलीला ट्रेनसमोर फेकून दिलं. यात या तरुणीने हात पाय गमावले असून तिच्या शरीरावर अनेक जखमा झाल्या आहेत. उत्तर परदेशमधील बरेलीत घडलेल्या या घटनेमुळे एकच खळबळ उडाली आहे. दरम्यान मुख्यमंत्री योगी आदित्यनाथ यांनी या घटनेची गंभीर दखल घेतली असून संबंधित पोलीस स्थानकाचे प्रभारी निरीक्षक, प्रभारी आणि बीट कॉन्स्टेबलला निलंबित केलं आहे. सदर तरुणीला ५ लाख रुपयांची आर्थिक मदत करताना विभागीय पातळीवर तपासाचे आदेश देण्यात आले आहेत.

पीडित तरुणी कोचिंगवरून घरी परतत असताना ही घटना घडली. सध्या या तरुणीची प्रकृती चिंताजनक असल्याच डॉक्टरांनी सांगितलं. दरम्यान पोलिसांनी एका तरुणाला आणि त्याच्या वडिलांना अटक केली आहे. योगी आदित्यनाथ यांनी आदेश दिल्यानंतर पोलीस आयुक्त, आयजी यांच्यासह वरिष्ठ पोलीस अधिकाऱ्यांनी हॉस्पिटलमध्ये जाऊन पीडित तरुणीची आणि तिच्या कुटुंबियांची विचारपूस केली.

मिळालेल्या माहितीनुसार, पीडित तरुणी दलित समाजातील असून गावातील एक तरुण तिची मागच्या दोन महिन्यांपासून छेड काढत होता. कधीही कुठेही आपल्या मित्रांसह तो तरुण तिला अडवत असे. घरातील महिला गावची प्रमुख असल्यामुळे सुरुवातीला पीडित तरुणीने याबाबत कुटुंबियांना सांगण्याचं टाळलं. मात्र, दिवसेंदिवस हे प्रकार वाढतच गेल्यामुळे तिने सर्व प्रकार घरी सांगितला. मात्र, त्यांनी याकडे दुर्लक्ष केलं. चौकशीही केली नाही. त्यामुळे हा अनर्थ घडला आणि सदर तरुणीचा आता जगण्यासाठी संघर्ष सुरू आहे.