Noida: कर्फ्यूच्या वेळी जेवण देण्यास नकार; गोळ्या घालून मालकाची हत्या

ग्रेटर नोएडामधील (Greater Noida) फुड डिलीवरी करणाऱ्या मालकाची गोळ्या घालून हत्या करण्यात आली आहे. शनिवारी रात्रीच्या वेळी मालकाने कोरोनामुळे (Corona) लावण्यात आलेल्या कर्फ्यूच्या वेळी जेवण देण्यास नकार दिला. त्यामुळे दोन जणांनी गोळ्या घालून त्याला ठार केले. आरोपींनी अटक करण्यात आली आहे. पोलिसांनी दिलेल्या माहितीनुसार, कपिल असे मृताचे नाव आहे. तो हापूरचा रहिवासी असून तो 27 वर्षीय होता. तो नोएडामध्ये एक भोजनालय चालवत होता. कपिलने त्यांना मध्यरात्री पराठे देण्यास नकार दिल्याने आरोपी संतप्त झाले आणि त्यांनी कपिलचा खून केला.

पोलिसांनी दिलेल्या माहितीनुसार, रेस्टॉरंट बंद असल्याने तो त्यांना जेवण देऊ शकला नाही तशी माहिती कपिल त्या दोघांना दिली होती. यावरून जोरदार वादावादी झाली, त्यानंतर आरोपी तेथून निघून गेले. पहाटे 3.30 च्या सुमारास ते बंदुक घेऊन भोजनालयावर परतले आणि घटनास्थळावरून पळून जाण्यापूर्वी कपिलवर गोळी झाडली, असे पोलिसांनी सांगितले. रात्री उशिरा परी चौकाजवळ एका व्यक्तीवर गोळी झाडल्याची माहिती पोलिसांना मिळाली. त्याला गोळी लागल्याने त्याला रुग्णालयात नेले असता त्याचा मृत्यू झाला.

दरम्यान, आकाश आणि योगेंद्र या आरोपींना अटक करण्यात आली आहे. त्यांना न्यायालयीन कोठडीत पाठवण्यात येणार आहे. हे दोघेजण गेल्या तीन वर्षांपासून संबंधित भोजनालयात वारंवार येत होते. भारतीय दंड संहितेच्या कलम ३०२ आणि ३४ अंतर्गत आरोपींविरुद्ध एफआयआर दाखल करण्यात आला आहे.

Edited By: Pravin Dhamale