दिलासादायक! देशातील कोरोना रुग्णसंख्येत किंचित घट; पाहा ताजी आकडेवारी

नवी दिल्ली : कोरोनाची (Corona) तिसरी लाट ओसरल्यानंतर देशात रुग्णसंख्या मोठ्या प्रमाणात कमी झाली होती. मात्र गेल्या काही दिवसांपासून देशात पुन्हा एकदा कोरोना संसर्गाने डोकं वर काढायला सुरूवात केली आहे. त्यामुळे कोरोनाचा वाढता प्रादुर्भाव रोखण्यासाठी आरोग्य विभाग सतर्क झाला आहे. अशातच आरोग्य मंत्रालयाने देशात गेल्या 24 तासांत आढळून आलेल्या कोरोना रुग्णांची आकडेवारी जाहीर केली आहे. (Corona Virus Latest Update in India)

आरोग्य मंत्रालयाने जाहीर केलेल्या आकडेवारीनुसार देशात गेल्या 24 तासांत कोरोनाचे 3 हजार 714 रुग्ण आढळून आले आहेत. तर यादरम्यान 7 जणांचा मृत्युही झाला आहे. त्यामुळे देशात सक्रिय कोरोनाबाधितांची एकूण संख्या 26,976 इतकी झाली आहे. तर आतापर्यंत 5,24,708 रुग्णांना कोरोनामुळे आपला जीव गमवावा लागला आहे.

अहवालानुसार, 24 तासांत तब्बल 2,513 रुग्णही कोरोना संसर्गमुक्त झाले आहेत. त्यामुळे देशात कोरोनापासून बरे झालेल्या रुग्णांची एकूण संख्या 4,26,33,365 वर पोहचली आहे. दरम्यान, रविवारी (5 मे) देशात कोरोनाचे 4 हजार 518 नवीन रुग्ण आढळून आले होते. रविवारच्या तुलनेत सोमवारी कमी रुग्णसंख्या आढळून आली आहे.

यापूर्वी 5 जून रोजी कोरोनाचे 4 हजार 518 रुग्ण, 05 जून रोजी 4 हजार 270 रुग्ण, 04 जून रोजी 3 हजार 962 रुग्णांची नोंद करण्यात आली होती. 4 जून रोजी कोरोना विषाणूच्या संसर्गामुळे सर्वाधिक 26 लोकांचा मृत्यू झाला. आकडेवारीनुसार, देशातील एकूण सक्रिय प्रकरणांचा दर आता 0.06 टक्के आहे, तर कोरोनापासून बरे होण्याचा दर 98.8 टक्क्यांवर पोहोचला आहे.